ՌԴ-ի դեմ «նավթային զենքի» գործադրումը վտանգավոր է ԱՄՆ-ի համար. The Nation

Վաշինգտոնը Ռուսաստանի, Իրանի և այլ պետությունների դեմ օգտագործում է «նավթային զենքը», ինչը լուրջ վտանգներով է հղի իր իսկ Միացյալ Նահանգների համար: Այդ մասին, ինչպես տեղեկացնում է «Արմենպրես»-ը, գրել է ամերիկյան The Nation հանդեսը:

Նախքան ՌԴ-ի հետ Ղրիմի վերամիավորումն արևմտյան խոշոր նավթընկերությունները, ինչպիսիք են BP-ն, Chevron-ը, ExxonMobil-ը և Total-ը, Սև ծովի և Հյուսիսային սառուցյալ օվկիանոսի ռուսաստանյան հատվածներում նավթի արդյունահանման փոխշահավետ համագործակցության պլաններ էին մշակել «Գազպրոմի» և «Ռոսնեֆտի» հետ: Արևմտյան ընկերություններն արդյունքում ստանում էին նոր պաշարներից, իսկ Ռուսաստանը՝ հորատման առաջավոր տեխնոլոգիաներից օգտվելու հնարավորություն, որոնք նրա համար նշանակում են դժվարամատչելի հանքավայրերը շահագործելու հնարավորութ յուն:

Իրանի դեպքում Վաշինգտոնը պատժամիջոցների օգնությամբ միաժամանակ արգելափակում է արևմտյան տեխնոլոգիաներից օգտվելու Թեհրանի հնարավորությունը և կրճատում նրա արտահանական վաճառքները: Դրա հետևանքով նավթի արտահանումից Իրանի եկամուտները 2011 – 2012 թվականների 118 միլիարդ դոլարից 2013 – 2014 թվականներին կրճատվել են մինչև 56 միլիարդ դոլար:

Օբամայի վարչակազմը «նավթային զենքն» օգտագործում է որպես արտաքին քաղաքականության հիմնական գործիք և այն պետությունների հետ պատերազմելու նոր միջոց, որոնց նա համարում է թշնամական, նշել է հանդեսը:

Նման միջոցների օգտագործումը հղի է լուրջ վանգներով, գրել է հրատարակությունը: «Նավթային պատերազմները» կարող են հանգեցնել աշխարհի շուկաներում էներգակիրների պակասի և դրանց գների անվերահսկելի աճի, ինչն, իր հերթին, կարող է սպառնալ ամերիկյան տնտեսության առողջությանը և նույնիսկ հանգեցնել գլոբալ ռեցեսիայի: Բացի դրանից, ի պատասխան Վաշինգտոնի ագրեսիվ մարտավարության, մյուս երկրները կարող են գտնել «նավթային զենքն» ԱՄՆ-ի դեմ շրջելու իրենց միջոցները, կարծում է The Nation-ը, հաղորդել է ՌԻԱ Նովոստին: