Երվանդ Զախարյանն ու «Ռոսատոմի» ղեկավարը կքննարկեն ՀԱԷԿ-ի նոր էներգաբլոկի կառուցման ծրագիրը

Փարիզում հոկտեմբերի 14-16-ը կկայանա Ատոմային էներգետիկայի համաշխարհային ցուցահանդեսը, որին մասնակցելու նպատակով Ֆրանսիա է մեկնել ՀՀ էներգետիկայի և բնական պաշարների նախարարության պատվիրակությունը՝ նախարար Երվանդ Զախարյանի գլխավորությամբ: Ինչպես «Արմենպրես»-ին տեղեկացրին ՀՀ էներգետիկայի և բնական պաշարների նախարարության տեղեկատվության և հասարակայնության հետ կապերի բաժնից, նախատեսվում է, որ Ատոմային էներգետիկայի համաշխարհային ցուցահանդեսին կմասնակցեն միջուկային էներգետիկայի ոլորտի շուրջ 500 ընկերություններ ու փորձագետներ:

Ցուցահանդեսում կներկայացվեն ատոմային էներգետիկայի բնագավառին առնչվող համաշխարհային նորարարություններ, որոնք վերաբերում են ոլորտի նորագույն սարքավորումներին և տեխնոլոգիաներին, նոր ատոմային էլեկտրակայանների կառուցմանը, ատոմային էլեկտրակայանների անվտանգ շահագործմանը, դրանց հսկողությանը, սերտիֆիկացմանը, աշխատած վառելիքի փոխադրմանը, պահեստավորմանը, կադրերի վերապատրաստմանն ու այլ հարցերի:

Միջոցառման շրջանակներում Հայաստանի պատվիրակությունը հանդիպում կունենա Ռուսաստանի պատվիրակության հետ: «Ռոսատոմի» ղեկավար Սերգեյ Կիրիենկոյի հետ կքննարկվեն ՀԱԷԿ-ի գործող էներգաբլոկի շահագործման ժամկետի երկարացման հարցում համագործակցության հնարավորությունները: Կշարունակվեն նաև բանակցությունները նոր էներգաբլոկի կառուցման ծրագրի շուրջ: