ԻԼԻՊ-ն Ադրբեջանում «իսլամական ընդդիմություն» է ստեղծում. ադրբեջանական մամուլ

Արմատական կրոնական խմբավորումները կարող են քաղաքական ընդդիմության վերածվել Ադրբեջանում:

Ինչպես հաղորդում է «Արմենպրես»-ը, publika.az-ի հետ զրույցում նման կարծիք է հայտնել Ադրբեջանի խորհրդարանի պատգամավոր Ֆազիլ Մուստաֆան' նշելով, որ «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման դեմ միջազգային կոալիցիոն պատերազմն իրական է դարձնում նրանց տուն վերադարձը: Նա ուշադրություն է հրավիրել տուն վերադարձող ադրբեջանցի ջիհադականների' «կրոնական ընդդիմության» վերածվելու վտանգին:

Նրա խոսքով' Ադրբեջանում քաղաքական ընդդիմության համար անհրաժեշտ մակարդակի պլատֆորմ չկա, քանի որ ադրբեջանական ընդդիմությունը խմբակցություններ չունի խորհրդարանում: «Հենց այդ պատճառով էլ վտանգ կա, որ արմատական կրոնական խմբերը կարող են վերածվել քաղաքական ընդդիմության Ադրբեջանում և լրացնել այդ բացը»,- ասել է նա:

Ադրբեջանում «իսլամական ընդդիմության» վտանգն իրական է համարում նաև կրոնական կառույցների գծով Պետկոմիտեի նախագահի նախկին տեղակալ, փորձագետ Էլչին Ասգերովը:

«Չնայած ներկա դրությամբ այդ վտանգը դեռևս փոքր է, բայց ասել, թե այն բացակայում է, ճիշտ չէ: Ջիհադի համար Մերձավոր Արևելք գնացողները մի օր կվերադառնան: Նրանք պոտենցիալ վտանգի աղբյուր են Ադրբեջանում: Չի բացառվում, որ նրանք կակտիվանան քաղաքական ուղղությամբ ևս»,- ասել է նա:

Կայքը հայտնում է, որ «Կարնեգի» հիմնադրամի Կովկասի գծով փորձագետ Թոմաս դե Վաալը BBC-ին տված հարցազրույցում, խոսելով Ադրբեջանին սպասվող ռիսկերից, չի բացառել մոտ ապագայում Ադրբեջանում կրոնական արմատական խմբավորումների' քաղաքական հրապարակում հայտնվելը:

«Այդ արմատական խմբի' Ադրբեջանում քաղաքական հրապարակ մտնելու վտանգ կա: Այսօր Սիրիայում և Իրաքում «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման կազմում կռվողները մի օր կվերադառնան տուն»,- ասել է Թոմաս դե Վաալը:

Նրանից օրեր առաջ Եվրոպայի ինստիտուտի աշխատակից Նադանի Ֆրիդրիխսոնն էլ հայտարարել էր Ադրբեջանում «մահմեդական ընդդիմության» վտանգի մասին:

«Մահմեդական ընդդիմության հիմքը կարող են կազմել Սիրիայում հեղաշրջմանը մասնակցող, այժմ էլ տուն վերադարձող ջիհադական ադրբեջանցիները: Այդ տեսակետից, պայթյունավտանգ տարածաշրջանների թվին կարելի է դասել նաև Ադրբեջանին»,- ասել էր փորձագետը:

Այդ մասին ազդարարում է նաև ԱՄՆ-ի հեղինակավոր «Stratfor» կենտրոնը: «ԻԼԻՊ-ի գործոնը մոտ ապագայում կարող է վտանգի ենթարկել Կովկասը: Ադրբեջանի և Կովկասի մահմեդական բնակչությունը հակում ունի այդ խմբավորման նկատմամբ, և ապագայում դա կարող է գլխացավանքի վերածվել Բաքվի և Մոսկվայի համար»,- հայտնում է կենտրոնը:

«Deutsche Welle»-ն էլ իր հերթին գրում է, որ այսօր ԻԼԻՊ-ին մարտիկներ մատակարարող հիմնական կենտրոնները հանդիսանում են Հյուսիսային Կովկասը և Ադրբեջանը, ինչի պատճառով էլ նրանց վերադարձն արդիական է դարձնում այդ տարածաշրջանների համար ջիհադի վտանգը:

Ադրբեջանական մամուլն ավելի վաղ հայտնել էր, որ ադրբեջանցի ջիհադականներն արդեն մի քանի տարի տարբեր ահաբեկչական խմբավորումների կազմում կռվում են Սիրիայում, Իրաքում, Աֆղանստանում և Պակիստանում: Նրանց թիվն այդ երկրներում անցնում է 500-ից: Միայն Սիրիայում վերջին երեք տարում սպանվել են մոտ 200 ադրբեջանցի ահաբեկիչներ: