ԵՏՄ-ին անդամակցությունը նոր հորիզոններ է բացում ՀՀ գյուղատնտեսության համար. Հովիկ Աբրահամյան

Եվրասիական տնտեսական միությանը Հայաստանի անդամակցությունը նոր հորիզոններ է բացում գյուղատնտեսական ապրանքների արտահանման ծավալների մեծացման համար: «Արմենպրես»-ի փոխանցմամբ' «Երևան Էքսպո» ցուցահանդեսային համալիրում բացված «Հայագրոֆորում» համաժողովում այս մասին նշեց ՀՀ վարչապետ Հովիկ Աբրահամյանը: Այդ համատեքստում վարչապետն անհրաժեշտ է համարում ազգային գյուղատնտեսական շուկայի ենթակառուցվածքների շուտափույթ արդիականացումը, միջազգային չափորոշիչներին համապատասխան ապրանքատեսակների որակի ապահովումը:

«Այսօր, ավելի քան երբևէ, Հայաստանում բարենպաստ պայմաններ են ստեղծված գյուղատնտեսության զարգացման համար: Ծանոթ լինելով գյուղացու հոգսերին և խնդիրներին և գիտակցելով մրցունակ գյուղատնտեսության դերը երկրի առաջընթացի գործում՝ ՀՀ կառավարությունը հետևողական քայլեր է ձեռնարկելու գյուղական վայրերի սոցիալական խնդիրների լուծման և գյուղատնտեսական ոլորտի արդիականացման ուղղությամբ:

Վերջին տարիների ընթացքում երկրի ագրոարդյունաբերական համալիրն առաջատար դիրք է զբաղեցնում մեր ազգային տնտեսությունում: Նոր թափ է ստանում գյուղական վայրերի սոցիալական նշանակության ենթակառուցվածքների զարգացման գործընթացը, կառուցվում են կարևոր օբյեկտներ: Վստահ եմ, որ աստիճանաբար բարելավվելու է նաև կյանքի մակարդակը: ՀՀ կառավարության մոտեցումն այն է, որ ագրարային ոլորտում լուրջ ռազմավարական բարեփոխումները պետք է ապահովեն առավել բարենպաստ պայմաններ յուրաքանչյուր տնտեսվարող սուբյեկտի զարգացման համար»,- ասաց Հովիկ Աբրահամյանը:

Վարչապետի խոսքով՝ գյուղատնտեսությունն էական ազդեցություն ունի երկրի ամբողջ տնտեսության զարգացման վրա, և կառավարությունը շարունակելու է պետական աջակցություն ցուցաբերել ոլորտի զարգացմանը, իսկ ագրարային քաղաքականությունն ուղղված է լինելու աշխատանքային անհրաժեշտ պայմանների ապահովմանը:

Գյուղատնտեսության բնագավառում ներդրած ավանդի և գյուղատնտեսության աշխատողի օրվա կապակցությամբ Հովիկ Աբրահամյանը ՀՀ վարչապետի հուշամեդալով է պարգևատրել և շնորհակալագրով խրախուսել ոլորտի մի խումբ ներկայացուցիչների:

Վարչապետը շրջեց նաև «Արմպրոդէքսպո» ցուցահանդեսին մասնակից ագրոպարենային ոլորտը ներկայացնող ընկերությունների տաղավարներով, ծանոթացել նրանց արտադրատեսականուն, գործունեությանը և առաջիկա ծրագրերին:

«Արմպրոդէքսպո-2014»-ին իրենց արտադրանքն են ներկայացնում 67 ընկերություններ Հայաստանից, Արցախից, Ռուսաստանից և Ուկրաինայից: Ցուցահանդեսի նպատակն է ներկայացնել Հայաստանում թողարկվող սննդարդյունաբերական լավագույն ապրանքատեսակները և վերամշակող արդյունաբերության ձեռքբերումները: Ցուցհանդեսին ներկայացված է գյուղատնտեսական ապրանքների լայն տեսականի' ոգելից խմիչքներ, հանքային ջրեր և բնական հյութեր, պտուղ-բանջարեղենային պահածոներ, կաթնամթերք, մսամթերք, ձկնամթերք, չոր մրգեր և հրուշակեղեն: