Նախագահների փարիզյան հանդիպման վերաբերյալ ադրբեջանցիները տեղեկություններն ստացել են հայկական աղբյուրներից. minval.az

Ադրբեջանում դժգոհ են երկրի նախագահի աշխատակազմի մամուլի ծառայության ղեկավար Ազեր Գասըմովի աշխատանքից, մասնավորապես այն բանից, որ Հայաստանի և Ադրբեջանի նախագահների հոկտեմբերի 26-ին փարիզյան հանդիպման վերաբերյալ տեղեկություններն ադրբեջանական ԶԼՄ-ները հարկադրված են եղել քաղել հայկական աղբյուրներից:

Ինչպես հաղորդում է «Արմենպրես»-ը, minval.az-ը գրում է, որ իրենք ևս ստիպված են եղել հաղորդել այդ հանդիպման մասին' օգտվելով Հայաստանի նախագահի մամուլի քարտուղար Արման Սաղաթելյանի թվիթերյան գրառումներից և հայկական ԶԼՄ-ներից:

«Եվ դրա համար էական պատճառ կար, որովհետև այդ պահին Ադրբեջանի նախագահի պատվիրակությանը կցված որևէ ԶԼՄ Փարիզում հանդիպման մասին տեղեկություն չէր հաղորդում: Ազեր Գասըմովը հերթական անգամ իրեն ցույց տվեց որպես խիստ պասիվ և, համապատասխանաբար, խիստ միջակ աշխատող: Լրագրողներին չի հաջողվում զրուցել նրա հետ: Միակ բանը, ինչով իսկապես հայտնի է դարձել Ադրբեջանի նախագահի աշխատակազմի մամուլի քարտուղար Ա.Գասըմովը, դա սկանդալային տեսանյութն էր, որում ֆիքսվել էր նրա անմիջական մասնակցությամբ ճանապարհային երթևեկության կանոնների խախտումը: Հանելուկ է մնում այն, թե ինչի համար էր նա այդպես շտապում աշխատանքի, եթե նրա աշխատանքը, որպես այդպիսին, չի երևում ընդհանրապես,- նշում է կայքը և հավելում,- այդ դեպքում հարց է առաջանում. ինչի համար է պետք է նախագահի աշխատակազմում մամուլի ծառայությունը, եթե այն, միևնույն է, չի աշխատում»: