Հիմնական կենսաթոշակի չափն ավելացվելու է 2000 դրամով. Արտեմ Ասատրյան

2015 թվականի հունվարի 1-ից հիմնական կենսաթոշակի չափն ավելացվելու է 2000 դրամով՝ սահմանվելով 16000 դրամ: Այս մասին այսօր Ազգային ժողովում այսօր՝ 2015 թվականի բյուջեի քննարկման ժամանակ, ասաց Աշխատանքի և սոցիալական հարցերի նախարար Արտեմ Ասատրյանը:

«2015 թվականի պետական բյուջեի միջոցների շրջանակում նախատեսվում է 14%-ով աշխատանքային կենսաթոշակների չափը, հիմնական շեշտադրումը գնում է ցածր կենսաթոշակ ստացող կենսաթոշակառուների կենսամակարդակի բարելավմանը, և այս առումով քաղաքականությունը շարունակվելու է: 2015 թվականի հունվարի մեկից հիմնական կենսաթոշակի չափն ավելացվելու է 2000 դրամով՝ սահմանվելով 16000 դրամ»,- ասաց Արտեմ Ասատրյանը:

Վերջինիս խոսքով` աշխատանքային առաջին 10 տարվա ստաժի մեկ տարվա արժեքի ավելացումը կլինի 100 դրամով, և 10 տարուց ավել յուրաքանչյուր տարվա համար՝ 500 դրամ, նախորդ տարվա 450-ի փոխարեն:

Արտեմ Ասատրյանը նշեց նաև, որ 2015 թվականի հուլիսի մեկից կբարձրացվեն նաև զինվորական կենսաթոշակները:

«Արդյունքում 2015 թվականին աշխատանքային կենսաթոշակի միջին չափը կանխատեսվում է 41000 դրամ, կենսաթոշակառուների թիվը՝ 458.127, շարքային զինծառայողների և նրանց ընտանիքների կենսաթոշակների միջին չափը՝ 25.000 դրամ, կենսաթոշակառուների թիվը՝ 2553, սպայական զինծառայողների կենսաթոշակի միջին չափը՝ 87.674 դրամ, կենսաթոշակառուների թիվը՝ 30.000, ծերության, հաշմանդամության նպաստների միջին չափը՝ 17.766 դրամ, նպաստառուների թիվը' 62,760»,- ասաց նախարարը:

Արտեմ Ասատրյանի խոսքով՝ 2015 թվականին ընտանեկան նպաստ և սոցիալական նպաստ ստացող ընտանիքների թիվը կկազմի շուրջ 104.685, և համաձայն օրենսդրական փոփոխության՝ ընտանեկան նպաստները դրանք միայն երեխա ունեցող անապահով ընտանիքներին տրվող նպաստներն են: