Հայաստանը Բելառուսի հետ կարող է տրակտորների հավաքման համատեղ ձեռնարկություն հիմնել

Հայաստանը Բելառուսի հետ նախնական պայմանավորվածություն է ձեռք բերել «МТЗ» մակնիշի տրակտորների հավաքումը Հայաստանում կազմակերպելու համար:

Այս մասին լրագրողնրի հետ հանդիպման ժամանակ տեղեկացրեց Գյուղատնտեսական տեխնիկայի պետական տեսչության պետ Վարդան Ղուշչյանը: Նրա խոսքով' գյուղնախարարի հանձնարարականով օրերս Բելառուս է մեկնել փոխնախարարը և հանդիպել համապատասխան պաշտոնյաների հետ: «Մի քանի օր առաջ նախարարի առաջին տեղակալը եղել է Մինսկի տրակտոր արտադրող գործարանում, ապա հանդիպել նաև Բելառուսի համապատասխան պաշտոնյաների հետ: Հաշվի առնելով այն, որ Հայաստանում օգտագործվող տրակտորների մոտ 50 տոկոսը բելառուսական «МТЗ» մակնիշի տրակտորներ են, գյուղնախարարությունը համապատասխան պայմանավորվածություն է ձեռք բերել, որ այստեղ ստեղծվի համատեղ ձեռնարկություն»,- «Արմենպրես»-ի հաղորդմամբ' ասաց Ղուշչյանը:

Նա նաև նշեց, որ մոտ օրերս Հայաստան կներկրվի 4 միավոր հացահատիկահավաք կոմբայն, որը լիզինգային եղանակով կտրամադրվի հողօգտագործողներին: «Մենք կոմբայնների շահագործման խնդիր ունենք, քանի որ դրանք շատ հին են և բերքի կորստի պատճառ են դառնում: Վերջերս ՓՄՁ ԶԱԿ-ի միջոցով կարողացանք լուծել նոր տեխնկայի ներկրման հարցը, և մոտ օրերս Հայաստան կներկրվի 4 միավոր հացահատիկահավաք կոմբայն: Հաջորդ 8 միավորի ներկրման փաթեթները ևս պատրաստ են: Կոմբայններից յուրաքանչյուրի արժեքը մոտ 30 մլն դրամ է, սակայն դրանք կտրամադրվեն լիզինգային եղանակով», - ասաց նա:

2014 թվականի հունվարի 1-ի դրությամբ հանրապետությունում առկա է 14 հազար 782 տրակտոր, 1355 հացահատիկահավաք կոմբայն, 2030 խոտհնձիչ և այլն: Այդ մեքենաները սարքին են 79 տոկոսով: Դրանց շուրջ 93 տոկոսը Խորհրդային Միության արտադրանք են և հիմնականում գտնվում են մաշված վիճակում< i>, իսկ 7 տոկոս տեխնիկան ձեռք է բերվել դրամաշնորհների և այլ միջոցների հաշվին: