Թուրքիայում հաշտության գործընթացը վտանգված է. Financial Times

Համաշխարհային Մամուլ 4 Նոյեմբեր, 2014 0:37

Թուրքիայում բռնությունների վերսկսման պատճառով երկրում քրդական խնդրի լուծման ուղղությամբ կառավարության երկու տարի առաջ նախաձեռնած «հաշտեցման գործընթացը» վտանգված է:

Ինչպես հաղորդում է «Արմենպրես»-ը, նման կարծիք է հայտնում բրիտանական Financial Times թերթն իր այսօրվա համարում` նշելով, որ Քրդստանի աշխատավորական կուսակցության (PKK) զինված թևի հետ թուրքական բանակի միջև բախումների վերսկսումը կարող է թուրքական կառավարության համար «ժողովրդի հետ կապերի և ռազմավարության աղետ» ծնել:

Թերթը գրում է, որ թեև ցմահ բանտարկված PKK-ի առաջնորդ Աբդուլլահ Օջալանը թուրքերի համար նույնանում է 30 տարի շարունակվող քրդական դիմակայության ընթացքում 40 հազար մարդկանց մահվան պատճառ դարձած պատերազմի հետ, սակայն, վերջին երկու տարում նույն Օջալանը կառավարության համար դարձել է «արյունալի ապստամբությունը դադարեցնելու ամենամեծ հույսը»:

«Օրերս փողոցային բախումներում տասնյակ մարդկանց մահվան, PKK-ի հետ բախումների վերսկսման և քրդաբնակ շրջաններում թուրքական բանակի զինվորների սպանության պատճառով Անկարայի հետ Օջալանի միջև բանակցությունները մտան ամենազգայուն և արյունալի փուլ»,- գրում է թերթը:

Թերթը հիշեցնում է, որ Թուրքիայի արդարադատության նախարար Բեքիր Բոզդաղն անցյալ ուրբաթ զգուշացրել էր, որ «բռնությունների շարունակման դեպքում Օջալանի հետ բանակցությունները կդադարեցվեն»:

«Օջալանը մեծ ազդեցություն ունի քրդերի մեծամասնության վրա: «Իրաքի և Լևանտի իսլամական պետություն» ահաբեկչական խմբավորման դեմ քրդերի պայքարում միջազգային աջակցության ժամանակաշրջանում PKK-ի հետ բախումների վերսկսումը Թուրքիայում կվերածվի իսկական աղետի»,- համոզմունք է հայտնում բրիտանական թերթը:

BBC-ն էլ իր հերթին հայտնել է, որ Միջազգային ճգնաժամային խմբից Հագ Պոպեն, մեկնաբանելով Թուրքիայում քրդական խնդրի շուրջ ստեղծված վերջին զարգացումները, ասել է, որ «ներքին համաձայնություն Թուրքիայում հնարավոր է, եթե Օջալանն ազատվի բանտից և PKK-ն թուրքական կառավարության հետ գնա հաշտության»: