Անհաշվենկատ տնտեսվարություն

Հայաստանում 2014թ. հոկտեմբերին սեպտեմբերի համեմատ արձանագրվել է պարենային ապրանքների 1.6 տոկոս գնաճ, ինչը հիմնականում պայմանավորվել է ձվի՝ 6.4 տոկոս, բանջարեղենի և կարտոֆիլի ապրանքախմբի՝ 15.3 տոկոս գնաճով: Պարենային 13 ապրանքախմբից 9-ում նշված ժամանակահատվածում արձանագրվել է 0.1-15.3 տոկոս գնաճ, 3-ում՝ 1.0-0.1 տոկոս գնանկում, իսկ մեկում պահպանվել է գների նախորդ ամսվա մակարդակը:

Լուրեր.com-ի հետ զրույցում «Սպառողների միություն» ՀԿ-ի նախագահ Արմեն Պողոսյանի կարծիք հայտնեց, որ գնաճի պատճառն անհաշվենկատ տնտեսվարությունն է:

«Ոչ օպտիմալ, ոչ ռացիոնալ տնտեսվարության արդյունքն է դա: Գների տատանումներ միշտ էլ եղել են և կլինեն: Այստեղ և՛ եղանակային, և՛ այլ գործոններ էլ կան, բայց դրանք ժամանակավոր են, իսկ մեզ մոտ գներն անընդհատ են աճում: Իմ համոզմամբ՝ մեր երկրում մթերում չկա:

Մթերում, նշանակում է՝ այնպիսի պայմաններ ստեղծել, որ այն մարդիկ, ովքեր աճեցնում են բերքը, ունենան հնարավորություն, որ գան իրենց դռնից տանեն, տանողներն էլ մրցակցային լինեն»,- ասաց Պողոսյանը:

Վերջինիս խոսքով՝ գնաճի թվերը պետք է նայել ավելի մեծ ժամանակահատվածով: «Եթե նայենք վերջին երեք տարվա ցուցանիշները՝ 2010-ից 2013-ը, մեզ մոտ մթերքն աճել է 18.8 տոկոսով»,- ասաց նա՝ հավելելով. «Գների թանկացումը նորմալ և բնական երևույթ է: Խնդիրն այն է, որ պետք է եկամուտներն աճեն առաջանցիկ տեմպերով: Մեզ մոտ հակառակն է՝ մեզ մոտ գները աճում են, բայց եկամուտներն այնքան քիչ են, որ վատանում է վիճակը»: