ԵԿՄ Ֆրանսիայի բաժանմունքը հանդես է եկել հայտարարությամբ

Ադրբեջանի զինված ուժերի կողմից Արցախի բանակի ուղղաթիռի ոչնչացումը Բաքվի կողմից հայերի և ընդհանրապես հայ աշխարհի նկատմամբ ատելության վառ արտացոլումն է: Այդ նենգ ագրեսիան, որն իրականացվել է ուսումնավարժական անզեն ուղղաթիռի ուղղությամբ՝ խլելով երեք հայ զինվորի կյանք, մեկ անգամ ևս հաստատում է այն փաստը, որ Ադրբեջանը զենքի ուժով է ուզում խոսել, այլ ոչ թե ձգտում է խաղաղության:

Բաքուն, հաշվի չառնելով նույնիսկ Ֆրանսիայի ջանքերը խաղաղության ամրապնդման գործում` մասնավորապես Փարիզում երկու շաբաթ առաջ կայացած բանակցությունները, ակնհայտ հրահրում է մարտական գործողությունների վերսկսում և դրանով անտեսում միջազգային հանրության հորդորը՝ խաղաղ ճանապարհով լուծել Արցախյան հիմնախնդիրը:

Միանալով Արցախի հերոս, զորավար Մանվել Գրիգորյանի՝ երեկ հրապարակված կոչին, մենք՝ Ֆրանսիայում գտնվող հայերս, մեր պատրաստակամությունն ենք հայտնում հարկ եղած դեպքում գալ հայրենիք, գեներալ Մանվելի կողքին ներգրավել Երկրապահ կամավորների շարքերը և արժանի դաս տալ հակառակորդին: Մենք պատրաստակամ ենք ցանկացած տիպի հակահարված տալու և պաշտպանելու մեր հայրենիքը, որպեսզի թշնամին երբեք չհանդգնի նոր ոտնձգություններ կատարել: Թուրքը պետք է միշտ իմանա, որ յուրաքանչյուր հայ, գտնվելով նույնիսկ իր հայրենիքի սահմաններից դուրս, իր ազգի և հայրենիքի երկրապահ զինվորն է և հարկ եղած դեպքում պատրաստ է միանալու իր հայրենիքի եղբայրներին և խիստ հակահարված տալու թշնամուն:

ԵԿՄ Ֆրանսիայի բաժանմունք

Ֆրանսահայ ազատամարտիկներ

Փարիզ քաղաքի հայ համայնք

Նանսի քաղաքի հայ համայնք

Մարսել քաղաքի հայ համայնք

Ռեն քաղաքի հայ համայնք

Ֆրանսիա, 13 նոյեմբեր, 2014 թվական