Բրիտանուհի ահաբեկիչը ողջ է և գտնվում է Սոմալիում. The Daily Mail

Մեծ Բրիտանիայի քաղաքացի Սամանթա Լյութվեյթը, ով հայտնի է «Սպիտակ այրի» մականունով, ողջ է և այժմ գտնվում է Սոմալիում: Ահաբեկչուհու վրա կրակ է բացվել «ռուս դիպուկահարի» կողմից՝ Ուկրաինայի արևելքում: Այս մասին հայտնել է ՌԻԱ Նովոստին՝ հղում անելով բրիտանական ԶԼՄ-ներին:

Ինչպես հայտարարել է Ուկրաինայի Ազգային անվտանգության և պաշտպանության ներկայացուցիչ Անդրեյ Լիսենկոն, բրիտանացի ահաբեկիչ Սամանթայի մասնակցությունն Ուկրաինայի արևելքում «Այդար» գումարտակի կազմում, ինչպես նաև նրա սպանությունը չեն համապատասխանում իրականությանը։

The Daily Mail պարբերականի տվյալներով՝ Լյութվեյթն ապրում է Սոմալիի հարավում՝ ամուսնու հետ, ով անվանում է իրեն «Մարկո Կոստա»։ «Կոստայի» անձնագրի լուսանկարում պատկերված է Ֆամի Ջամալ Սալիմը, ով 2011-ին երկու քենիացի ոստիկանի սպանելուց հետո թաքնվում է Քենիայի ոստիկանությունից:

«Մենք կարծում ենք, որ ունենք տեղեկություն Լյութվեյթի կյանքի և գտնվելու վայրի մասին։ Նա ամուսնացած է Սալիմի հետ, և նրանք 2 փոքր երեխա ունեն»,- գրում է պարբերականը։

Հաղորդվում է նաև, որ Լյութվեյթն ամուսնու հետ մասնակցում է «Աշ- Շաբաբ» խմբավորման գործողություններին և նախատեսում է հետագա ահաբեկչություններ Քենիայում և Սոմալիում։

Եվս մեկ ապացույց առ այն, որ «սպիտակ այրին» ամուսնու հետ գտնվում է Սոմալիում, դարձել է իրենց տանն արված համատեղ լուսանկարը: