ԵՄ-ն կխստացնի պատժամիջոցները, եթե աշխարհազորայինները հարձակման անցնեն. ԶԼՄ-ներ

Եվրամիությունը կարող է խստացնել Ռուսաստանի դեմ տնտեսական պատժամիջոցները, եթե Դոնեցկի և Լուգանսկի աշխարհազորայինները հարձակման անցնեն՝ ռազմական գործողությունները տեղափոխելով Ինքնահռչակ Հանրապետությունների սահմաններից դուրս: Այս մասին հայտնել է Взгляд-ը:

Եվրոպական կառույցների աղբյուրի փոխանցմամբ` պատժամիջոցների մասին կարող է խոսվել դեկտեմբերին կայանալիք գագաթնաժողովում:

ԵՄ արտաքին գործերի նախարարների նիստի  ընթացքում մի շարք նախարարներ կոչ են արել վերջնական փաստաթղթում ներառել արտահայտություններ Ռուսաստանի դեմ տնտեսական պատժամիջոցները խստացնելու հավանականության մասին, սակայն այդ առաջարկը մերժվել է: Որպես փոխզիջում՝ տեքստում նշվել է, որ ԵՄ խորհուրդը «կշարունակի հետևել իրադարձություններին և կգործի դրան համապատասխան»,- գրում է «Коммерсантъ»-ը:

Պարբերականի աղբյուրի փոխանցմամբ`ՌԴ տնտեսության մի շարք ոլորտներում պատժամիջոցները խստացնելու մասին քննարկումը կարող է տեղի ունենալ դեկտեմբերի 18-19-ին նախատեսված Եվրամիության գագաթնաժողովի ընթացքում: