Հայկական կարտոֆիլի որակը բարելավվել է, իսկ արտահանումը` ավելացել

Հայաստանում գյուղատնտեսներին հաջողվել է հաղթահարել կարտոֆիլի եւ լոլիկի ցեցի խնդիրը, որի արդյունքում էականորեն բարելավվել է կարտոֆիլի որակը:

Այս մասին լրագրողների հետ հանդիպմանը տեղեկացրեց ՀՀ գյուղատնտեսության նախարարի տեղակալ Սամվել Գալստյանը` արձանագրելով, որ եթե 2013թ. կարտոֆիլի բերքը կազմել էր շուրջ 660,5 հազար տոննա, ապա 2014թ. արդեն՝ 691 հազար տոննա: «Նախորդ տարի բարդություններ էին առաջացել կարտոֆիլի եւ լոլիկի որակի հետ կապված: Ցեցը լուրջ վնասներ էր հասցրել դաշտերին: Խնդրի լուծման նպատակով ձեռք բերվեցին և տեղադրվեցին ֆերոմոնային թակարդներ, որպեսզի հնարավոր լիներ պայքարի միջացառումները ժամանակին կազմակերպել: Արդյունքում մենք այս տարի ունեցանք „ կարտոֆլի արտադրության, ինչպես նաև արտահանման աճ»,- «Արմենպրես»-ի հաղորդմամբ՝ ասաց փոխանախարարը: Նրա խոսքով` կարտոֆիլի ցանքատարածությունները նախորդ տարվա համեմատ ավելացել են շուրջ 850 հեկտարով, իսկ կարտոֆիլի լավագույն բերք է արտադրվել Գեղարքունիքի մարզում:

Խոսելով շուկայում կարտոֆիլի բարձր գների մասին՝ Գալստյանը նշեց, որ դա կարող էր պայմանավորված լինել երկու հանգամանքով: «Նախ այս տարի Հայաստանից արտահանվել է շուրջ 20 հազար 600 տոննա կարտոֆիլ, այնինչ նախորդ տարի այս ժամանակահատվածում արտահանվել էր 11 հազար 700 տոննա: Դա հանգեցրեց շուկայում պահանջարկի բարձրացման, որն էլ հանգեցրեց գնաճի: Բացի այդ, եղանակային պայմաններից ելնելով արտադրողները որոշ ժամանակահատված ուշացրեցին կարտոֆիլի առաքումը շուկա, որն էլ իր հերթին նպաստեց պահանջարկի բարձրացմանն ու կարտոֆիլի թանկացմանը»,- ասաց նա: Փոխնախարարի խոսքով՝ վերջին մի քանի օրերին նկատվել է գնի որոշակի անկում, և արտադրված կարտոֆիլը շուկա հանելու պարագայում գները որոշակի կկարգավորվեն:

ՀՀ Արարատի և Արմավիրի մարզերում այս տարի իրականացվել են կարտոֆիլի ցեց և լոլիկի ականող ցեց վնասատուների մոնիթորինգի աշխատանքներ։ Դրանց արդյունքների հիման վրա համայնքներում տարվել են խորհրդատվական աշխատանքներ՝ վնասատուի դեմ արդյունավետ պայքար կազմակերպելու նպա­տակով։ Տրամադրված խորհրդատվության արդյունքում հողօգտա­գոր­ծողների կողմից իրականացված պայքարի համալիր միջոցառումների շնորհիվ զգա­լիորեն նվազել է բերքին վնասատուից հասցված վնասը: Մասնագետների կողմից դիտարկումները և խորհրդատվության տրամադրումը շարունակվում է: