Այդ մարդկանց հանո՞ւմ ենք, նրանց գցելու ենք փողո՞ց. Հովիկ Աբրահամյանը՝ Արման Սահակյանին

Կառավարության այսօրվա նիստում Պետական գույքի կառավարման վարչության պետ Արման Սահակյանը գործադրի հաստատմանը ներկայացրեց պետական գույքն օտարելու մասին նախագիծը, ինչն առաջացրեց վարչապետ Հովիկ Աբրահամյանի զայրույթը:

Նշենք, որ նախագծով առաջարկվում էր թույլատրել Հայաստանի Հանրապետության կառավարությանն առընթեր պետական գույքի կառավարման վարչությանը «Հայաստանի Հանրապետության ֆինանսների նախարարության աշխատակազմ» պետական կառավարչական հիմնարկին ամրացված Երևան քաղաքի Կիևյան 2-րդ նրբանցք թիվ 18 հասցեում գտնվող 450.2 քառ. մետր մակերեսով շենք շինությունները՝ (այսուհետ՝ գույք) (բնակելի տուն 394.2 քառ. մետր, ավտոտնակ 28.3 քառ. մետր, կաթսայատուն 27.7 քառ. մետր) և դրանց օգտագործման ու սպասարկման համար անհրաժեշտ 0.04095 հա հողամասն օտարել դասական աճուրդով՝ որպես գույքի մեկ միավոր:

Վարչապետ Հովիկ Աբրահամյանը հետաքրքվեց, թե ինչու են օտարում այս գույքը: Պատասխանելով՝ Արման Սահակյանը նշեց, որ նախարարությանը պարտք են եղել, և սա պարտքի դիմաց ընդունած գույք է: «Օտարում ենք, որ վերականգնենք այդ գումարները բյուջեով»,- ասաց Սահակյանը:

«Ասում եմ՝ ո՞ւմ ենք օտարում: Այստեղ մարդիկ են ապրում, բնակելի շենք է, և այդ մարդկանց հանո՞ւմ ենք»,- հարցրեց վարչապետը:

Արման Սահակյանը բացատրեց, որ այդ մարդիկ պարտք են պետությանը, և այդ տարածքը հիմա պետք է օտարվի, որպեսզի այդ պարտքն էլ մարվի:

«Հասկացա դա, դու իմ հարցին պատասխանի: Այդ մարդիկ այնտեղ ապրո՞ւմ են: Բա հիմա ի՞նչ ենք անելու, նրանց գցելու ենք փողո՞ց»,- ասաց Աբրահամյանը:

Վերջինս՝ դիմելով Կառավարության աշխատակազմի ղեկավար-նախարար Դավիթ Հարությունյանին, հարցրեց, թե ինչպես է այս հարցը ընդգրկվել օրակարգ:

Դավիթ Հարությունյանն ի պատասխան ասաց. «Պետական գույք է»:

«Հասկացանք, որ պետական գույք է, պարտք են, բայց ինչ սոցիալական խնդիր եք լուծում», - ասաց Հովիկ Աբրահամյանը և հանձնարարեց կրկին քննարկել հարցը: