Կիլիկիո կաթողիկոսարանը հետևողական աշխատում է Սիսի նստավայրը վերադարձնելու համար

Սիսի կաթողիկոսական նստավայրն ու հարակից հայկական կալվածքները հետ վերադարձնելու հարցը գտնվում է Մեծի Տանն Կիլիկիո Արամ Ա կաթողիկոսի ուշադրության կենտրոնում, և Անթիլիասը հետևողական ջանք ու աշխատանք է իրականացնում այդ հարցում հաջողության հասնելու համար: Շվեյցարիա կատարած հովվապետական այցի ժամանակ կաթողիկոսը զրուցել է լրագրողների հետ և շեշտել, որ ներկա դրությամբ փաստաբանների խումբն ուսումնասիրում է հարցը, որպեսզի ըստ պատշաճի կաթողիկոսարանը դիմի Թուրքիայի Սահմանադրական դատարան:

«Պետք է նշեմ, որ իրավական դաշտն այնքան էլ դյուրին չէ, այնքան էլ նպաստավոր չէ մեր ժողովրդի համար, սակայն պետք է հավաքական ճիգ գործադրել այդ ուղղությամբ: Բոլոր գործընթացները պետք է ճշտեն, որպեսզի մեր եկեղեցապատկան, ազգապատկան կալվածքները վերադարձնենք մեր ժողովրդին, մեր եկեղեցուն»,- «Արմենպրես»-ի հաղորդմամբ' ասել է Արամ Ա կաթողիկոսը:

Սեպտեմբերի 10-ին Երևանում կայացած Հայրենիք-Սփյուռք հինգերորդ համաժողովի ժամանակ Մեծի Տանն Կիլիկիո կաթողիկոս Ն.Ս. Օ.Տ.Տ. Արամ Ա-ն ասաց, որ Մեծի Տանն Կիլիկիո կաթողիկոսությունն այս տարի դիմելու է Թուրքիայի Սահմանադրական դատարան՝ Կիլիկիայի պատմական հայկական թագավորության տարածքում գտնվող Սիսի նստավայրը և կալվածքները վերադարձնելու պահանջով: «Մենք Սահմանադրական դատարանից պահանջելու ենք մեզ վերադարձնել մեր կալվածքները, իսկ Թուրքիայի Սահմանադրական դատարանի կողմից դիմումի մերժման դեպքում դիմելու ենք Մարդու իրավունքների եվրոպական դա տարան և մինչև վերջ պայքարելու ենք մեր նպատակին հասնելու համար»,- ասել է Արամ Ա-ն: