ԱՄՆ-ը 40 տոկոսով կրճատել է նավթի ներմուծումն ՕՊԷՔ-ի երկրներից. Financial Times

ԱՄՆ-ի կողմից նավթի ներմուծումն ՕՊԷՔ-ի երկրներից նվազել է մինչև 30-ամյա նվազագույնը: Այդ մասին, ինչպես տեղեկացնում է «Արմենպրես»-ը, հաղորդել է Լոնդոնի Financial Times թերթը:

«Նավթի ներմուծման կրճատումն ընդգծում է համաշխարհային առևտրի վրա թերթաքարային նավթի հեղափոխության ներգործությունը,- ընդգծում է հրատարակությունը:- Հիդրոճեղքման տեխնոլոգիայի բնագավառում առաջընթացն ԱՄՆ-ի ներքին հանույթը հասցրել է օրական մինչև գրեթե 9 միլիոն բարելի՝ ամենաբարձր ցուցանիշն 80-ական թվականների կեսերից ի վեր»:

FT-ի բերած տվյալների համաձայն՝ անցյալ օգոստոսին ԱՄՆ-ի նավթային ներմուծման մեջ ՕՊԷՔ-ի բաժինը նվազել է 40 տոկոսով՝ օրական մինչև 2,9 միլիոն բարել: «Սա ամենացածր ցուցանիշն է 1985 թվականից ի վեր»,- նշում է հրատարակությունը:

Թերթն ընդգծում է, որ ՕՊԷՔ-ի երկրների թվում «թերթաքարային հեղափոխությունից» ամենամեծ կորուստները կրում են Ալժիրը և Լիբիան, սակայն Սաուդյան Արաբիան և Վենեսուելան պահպանում են ուժեղ դիրքերը: Ինչպես ավելի վաղ հաղորդվել է, 2013 թվականի հուլիսին, էներգետիկական տեղեկատվության վարչության և էներգետիկայի միջազգային գործակալության տվյալներով՝ ԱՄՆ-ն օրական արդյունահանել է մոտավորապես 22 միլիոն բարել նավթ, գազ և դրանց հետ կապված վառելիք: Դրա հետևանքով գազի և անմշակ նավթի ներմուծումն ԱՄՆ հինգ տարում նվազել է 32 տոկոսով և 15 տոկոսով:& nbsp;

Փորձագետների գնահատումներով՝ ԱՄՆ-ում «թերթաքարային հեղափոխության» հետևանքներից մեկն է դարձել նավթի համաշխարհային գների անկումը: 2014 թվականի հունիսի վերջից, երբ Brent մակնիշի մեկ բարելի արժեքն այս տարի հասավ առավելագույն մակարդակին՝ 115 դոլարի, նավթի գներն իջել են 30 տոկոսով՝ մոտավորապես մինչև 80 դոլար, որը նվազագույնն է 2010 թվականի սեպտեմբերիրց ի վեր, հաղորդել է ՏԱՍՍ-ը: