Ադրբեջանում աճում է սոցիալ-տնտեսական լարվածությունը

Ձմռանը պատրաստ չլինելու պատճառով պետական կառույցների դեմ Ադրբեջանի բնակչության բողոքներն օրեցօր մեծանում են: Բաքվի որոշ շրջաններում ջրի, գազի և էլեկտրաէներգիայի մատակարարման ընդհատումներ են սկսվել, իսկ ձմռան գալու հետ այդ խնդիրներն աճելու են: Այս մասին, ինչպես հաղորդում է «Արմենպրես»-ը, հայտնում է «Ենի Մուսավաթ» թերթը և ընդգծում, որ ավելի լուրջ խնդիր կան, որոնց հետ Ադրբեջանը բախվելու է այս ձնեռ:

Ըստ թերթի' 2014 թվականի բյուջեում ֆիքսված նավթի մեկ բարելի դիմաց 100 ԱՄՆ դոլար նշաձողից նավթի գների անկումը սկսել է բացասական ազդեցություն ունենալ Ադրբեջանի տնտեսության վրա: Ադրբեջանի պետական նավթային հիմնադրամը «ԱզերԹԱջ» լրատվական գործակալությանը հայտնել է, որ նոյեմբերի 24-ին Լոնդոնի սակարանում «Ազերիլայթ» տեսակի նավթի մեկ բարելը վաճառվել է 81,79 դոլարով, այն դեպքում, երբ սեպտեմբերին այն կազմել էր 97, 98 դոլար:

Թերթը գրում է, որ թեև ադրբեջանական կառավարությունը բնակչությանը կոչ է անում չանհանգստանալ նավթի գների անկումով, ինչն անտրամաբանական է, միանգամայն հստակ է, որ այդ գործընթացի շարունակումն անհետևանք չի լինելու Ադրբեջանի արտաքին առևտրային շրջանառության և տարեկան մուտքերի համար:

«Ռուսաստանում տնտեսական ճգնաժամի պատճառով վերադարձող ադրբեջանցիները կարող են սոցիալական լարվածության աճի, զանգվածային ելույթների և քրեածին իրադրության վատացման պատճառ դառնալ: Ձմռանը կաճեն մսամթերքի գները, նավթը կշարունակի էժանանալ, և Ադրբեջանը կկանգնի ծանր խնդիրների առաջ»,- զգուշացնում է թերթը:

Թերթին հասած տեղեկություններով' արդեն սկսվել է Ռուսաստանից ադրբեջանցիների վերադարձը հյուսիսային, արևմտյան և հարավային շրջաններ: Ռուսաստանի դրամական փոխանցումները վերջին ամիսներին կտրուկ նվազել են: Պաշտոնական տվյալներով, խոսքը 1,8 մլրդ դոլարի մասին է, ոչ պաշտոնական տվյալներով այդ միջոցները երկու անգամ ավելի են:

«Ադրբեջանցիների վերադարձն, անկասկած, կվատացնի երկրում քրեածին իրադրությունը: Տեղեկություններ կան, որ շրջաններում տեղական գործադիր իշխանություններն ու իրավապահ մարմինները վատ են ընդունում վերադարձողներին: Խմբագրություն դիմած օրերս վերադարձած մի քաղաքացի հայտարարել է, որ իշխանություններն իրեն հրաժարվում են գրանցել, անգամ պահանջում են տեղեկանք բերել Ռուսաստանում դատված չլինելու մասին: Այդ փաստը ցույց է տալիս, որ սոցիալական լարվածությունը և քրեածին իրադրության վատացումը կանխելու համար գործադիր իշխանությունը վարչական մեթոդներ է օգտագործում»,- գրում է թերթը: