Ինչու արժեզրկվեց դրամը. Կենտրոնական բանկը տվել է բոլորին հետաքրքրող հարցի պատասխանը

Դրամի արժեզրկումը կամ ճշգրտումը պայմանավորված է օբյեկտիվորեն գոյություն ունեցող և Հայաստանի արժութային շուկայի վրա ազդող մի քանի գործոններով: Լրագրողների հետ ճեպազրույցում ՀՀ կենտրոնական բանկի խորհրդի անդամ Արմենակ Դարբինյանը պարզաբանեց, թե որ գործոններն են նպաստել դրամի արժեզրկմանը: «Առաջին հերթին դրամի փոխարժեքի ճշգրտմանը նպաստեցին արտաքին գործոնները, այսինքն' մեր գործընկեր երկրների տնտեսություններում տեղի ունեցող զարգացումները' տնտեսական աճի անկումը և ազգային արժույթի արժեզրկումը: Օրինակ, Ռուսաստանի Դաշնության տնտեսությունում տեղի ունեցող զարգացումները չէին կարող չազդել մեզ վրա: Հաջորդ արտաքին գործոնը մի շարք երկրներում նկատվող դոլարի արժևորման երևույթն էր: Դոլարն իր դիրքերն էր ամրապնդում ինչպես տարածաշրջանի, այնպես էլ Եվրամիության երկրներում' Չեխիայում, Լեհաստանում, Բուլղարիայում, Հունգարիայում և այլն: Այդ երկրներում տարեկան արժեզրկումը հասել էր 8-11 տոկոսի»,- «Արմենպրես»-ի հաղորդմամբ' ասաց Դարբինյանը:

Կենտրոնական բանկի խորհրդի անդամի խոսքով' տարբեր ապրանքների շուկաներում շարունակվում են գնանկումային միտումները: «Մեզ առնչվում են հիմնականում հանքաքարերի շուկաները, որտեղ նկատվող գնանկման հետևանքով կրճատվում է արժութային հոսքերի ներթափանցումը երկիր: Այս ամենն, ինչ խոսք, պետք է իր ազդեցությունն ունենար: Վերջին երկու շաբաթներում ճնշումն արժութային շուկաների վրա զգալի ավելացել էր և դրանով պայմանավորված' անհրաժեշտություն կար ճշգրտել դրամի փոխարժեքը, քանի որ հակառակ դեպքում մենք ունենալու էինք տարբեր բացասական ազդեցություններ»,- ասաց նա: Դարբինյանը բացատրեց, որ գործընկեր պետություններում ևս ազգային արժույթները թուլացել են, որի հետևանքով տեղի էր ունենում արտահանման մրցունակության նվազում: «Սա կարող էր հանգեցնել արտահանման ծավալների կրճատման, զբաղվածության և եկամուտների կրճատման»,- հավելեց նա:

Արմենակ Դարբինյանի խոսքով' կարևոր հանգամանք է այն, որ եթե արժութային շուկաներում ԿԲ-ը փորձում է արհեստականորեն պահպանել ազգային արժույթի փոխարժեքը, ապա դա տեղի է ունենում արժութային ռեզերվների հաշվին: «Հենց այս նկատառումներից ելնելով էլ' երեկ տեղի ունեցավ դրամի փոխարժեքի ճշգրտում»,- ասաց նա: