Բերիո թեմի առաջնորդն այցելել է Քեսաբի հայկական ճեմարան

Բերիո թեմի առաջնորդ Գերշ. Տեր Շահան Արք. Սարգիսյանը և Ազգային վարչության անդամ Զարեհ Փոլադյանը նոյեմբերի 25-ին այցելել են Քեսաբի ազգային ուսումնասիրաց ճեմարան, խրախուսել աշակերտներին և հանդիպել ճեմարանի տնօրինության, հոգեբարձուների և ուսուցչական կազմի հետ:

Այս մասին «Արմենպրես»-ը տեղեկացավ «Գանձասար» թերթի խմբագրությունից: Հանդիպման ընթացքում զրուցել են վարժարանի ուսումնակրթական ընթացքի, դժվարությունների և աշակերտների ընդհանուր վիճակի մասին: Սրբազան հայրը հորդորել է նոր եռանդով ու կորովով անկացնել ուսումնական տարին և խաղաղություն է մաղթել սիրիական հայրենիքին ու Քեսաբին՝ բարձր գնահատելով աշակերտների հետևողական ընթացքը: Սրբազան հայրը շեշտել է, որ ողջ հայությունը զորավիգ կկանգնի սիրիահայ վարժարաններին և աշակերտներին:

Ավելի վաղ քեսաբահայ Կարո Մանճիկյանը «Արմենպրես»-ի հետ զրույցում նշել էր, որ ընդհանուր առմամբ իրավիճակը Քեսաբում ավելի հանգիստ է, դպրոցները բնականոն գործում են, շուկաները և խանութները բաց են, մթերքների տագնապ չկա, թեպետ որոշ ապրանքներ թանկ են: Բոլոր եկեղեցիները գործում են որոշակի վերանորոգման աշխատանքներ իրականացնելուց հետո: