Նոյեմբերին դոլարի փոխարժեքը 3.5 տոկոսով գերազանցել է նախորդ տարվա ցուցանիշը

ԱՄՆ դոլարի նկատմամբ հայկական դրամի միջին հաշվարկային փոխարժեքը 2014թ. նոյեմբերին կազմել է 419.1 դրամ, ինչը 3.5 տոկոսով գերազանցել է 2013թ. նոյեմբերի համապատասխան ցուցանիշը (405.0 դրամ):

Ինչպես «Արմենպրես»-ին տեղեկացրին ՀՀ ազգային վիճակագրական ծառայությունից, Հայաստանի սպառողական և արտարժույթի շուկաներում 2014թ. նոյեմբերին հոկտեմբերի համեմատ արձանագրվել է գների և ԱՄՆ դոլարի նկատմամբ հայկական դրամի հաշվարկային փոխարժեքի համապատասխանաբար 1.3 և 2.2 տոկոս հավելաճ (ԱՄՆ դոլարն արժևորվել է):

2014թ. նոյեմբերին 2013թ. դեկտեմբերի համեմատ սպառողական գներն ու հաշվարկային փոխարժեքն աճել են համապատասխանաբար 1.5 և 3.4 տոկոսով: Նախորդ տարվա նույն ժամանակահատվածում հանրապետությունում արձանագրվել էր սպառողական գների 4.5 տոկոս հավելաճ և հաշվարկային փոխարժեքի 0.1 տոկոս նվազում: