ԵՏՄ-ի երկրները նախատեսում են փոխադարձ հաշվարկներում հրաժարվել դոլարից և եվրոյից

Եվրասիական տնտեսական միության տարածքում ենթադրվում է արգելել դոլարով և եվրոյով գործառնությունները միջազգային այդ տնտեսական միավորման անդամ երկրների միջև: «Իզվեստիա» թերթի տվյալներով՝ միայն ազգային արժույթներով (ռուսական ու բելառուսական ռուբլով, ինչպես նաև թենգեով ու դրամով) հաշվարկներին անցնելը պետք է տեղի ունենա 2025-2030 թվականներին:

Այս առաջարկությունը տեղ է գտել ԵՏՄ-ի տարածքում վճարային համակարգերի զարգացման հայեցակարգի նախագծում, «Իզվեստիա»-ին հայտնել է Ազգային վճարային խորհրդի տնօրենների խորհրդի նախագահ, Ռուսաստանի արդյունաբերողների ու ձեռնարկատերերի միության փոխնախագահ Ալեքսանդր Մուրիիչովը:

Նրա խոսքով՝ հայեցակարգը ենթադրում է մասնակից երկրների ընդհանուր վճարային տարածության ենթակառուցվածքի ստեղծում, որը թույլ կտա վճարումները կատարել ազգային քարտային համակարգերի, այդ թվում՝ վճարային քարտերի ստեղծվող ռուսական ազգային համակարգի, «Բելքարտ» (Բելառուս) և Armenian Card ներկայում գործող համակարգերի համատեղելիության հաշվառմամբ: Ընդսմին առաջարկվում է ԵՏՄ-ի տարածքում հրաժարվել դոլարի և եվրոյի շրջանառությունից:

«ԵՏՄ-ի միասնական վճարային տարածության ստեղծումը կբերի բազմարժութային համակարգի ներդրման սուր անհրաժեշտության կամ միասնական արժույթի վճարային տարածքի արագացված անցման,- նշել է Ալեքսանդր Մուրիչովը:- Միաժամանակ անհրաժեշտ է մասնակից երկրների ազգային բանկերի առջև դնել միջպետական վճարային շրջանառությունից ԱՄՆ-ի դոլարի և եվրոյի բացառման հարցը», հաղորդել է ՏԱՍՍ-ը: