ՆԱՏՕ-ն «կրակի հետ է խաղում»՝ դաշինք հրավիրելով Ուկրաինային. Der Spiegel

Բոլոր նրանք, ովքեր խոսում են ՆԱՏՕ-ին Ուկրաինայի հնարավոր անդամակցության մասին, «կրակի հետ են խաղում»: Այդ մասին, ինչպես տեղեկացնում է «Արմենպրես»-ը, գրել է Der Spiegel-ի լրագրող Քրիստիան Շուլտը:

Լրագրողի կարծիքով՝ Ուկրաինայի նախագահ Պյոտր Պորոշենկոյի այն հայտարարությունը, թե ՆԱՏՕ-ի անդամակցման հարցը հանրաքվեով կլուծի ուկրաինացի ժողովուրդը, ինչպես նաև Ենս Ստոլտենբերգի արտահայտություններն այն մասին, թե երկիրը կարող է դառնալ դաշինքի անդամ, չեն օգնում «ո՛չ ՆԱՏՕ-ին, ո՛չ էլ Ուկրաինային» և սոսկ նպաստում են դաշինքի պառակտմանը:

Շուլտը հիշեցնում է, որ Ենս Ստոլտենբերգը, որը ՆԱՏՕ-ն գլխավորում է 2014 թվականի հոկտեմբերի 1-ից, համարվում էր ավելի խելամիտ և շրջահայաց քաղաքական գործիչ, քան նրա նախորդը՝ Անդերս Ֆոգ Ռասմուսենը: Առայժմ նրանց միջև ոչ մի տարբերություն չկա, կարծում է լրագրողը՝ նշելով, որ դաշինքի մեկ այլ բարձրաստիճան ներկայացուցիչ՝ ՆԱՏՕ-ի ուժերի գլխավոր հրամանատար Ֆիլիպ Բրիդլավը, նույնպես բնավ չի նպաստում հակամարտության կարգավորմանը:

Ուկրաինական ճգնաժամի հենց սկզբից դաշինքն այն դիրքն է բռնել, որի համաձայն հակամարտության ռազմական լուծում լինել չի կարող: «Եթե դա իրոք այդպես է, ապա ավելի լավ է, որ Ստոլտենբերգը, Բրիդլավը և նրանց ընկերախմբերը լռեն»,- եզրակացնում է Շուլտը:

Նրա կարծիքով՝ Ուկրաինայի և ՆԱՏՕ-ի փոխգործակցության միակ ճիշտ տարբերակը համապատասխանում է այն բանին, ինչպես այն տեսնում է Գերմանիայի արտաքին գործերի նախարար Ֆրանկ Վալտեր Շտայնմայերը. գործընկերություն, բայց ոչ անդամակցում, հաղորդել է ՌԻԱ Նովոստին: