Թուրքական մամուլը` Պուտինի այցի մասին

Թուրքական մամուլն ակտիվորեն մեկնաբանում է Ռուսաստանի Դաշնության Նախագահ Վլադիմիր Պուտինի Անկարա կատարած այցի արդյունքները: Ինչպես հաղորդում է «Արմենպրես»-ը, թուրքական մամուլը գլխավոր շեշտը դնում է Պուտինի այն հայտարարության վրա, որ երկու երկրների միջև 32 մլրդ դոլարի ներկայիս տարեկան ապրանքաշրջանառությունը կարող է աճել մինչև 100 մլրդ դոլար:

Մամուլը երկու երկրների միջև ստորագրված 8 փաստաթղթերից առաձնացնում է հատկապես ՌԴ-ից Թուրքիա Սև ծովի հատակով նոր գազատար անցկացնելու մասին «Գազպրոմ»-ի և «Բոթաշ»-ի միջև ձեռք բերված համաձայնությունը, հանքավայրերի համատեղ մշակումը, ատոմային էլեկտրակայանի շինարարությունը: Նշվում է, որ Ռուսաստանը խոստացել է միջուկային տեխնոլոգիաներ արտահանել և միջուկային կենտրոն կառուցել Թուրքիայում:

Առանձնացվում է նաև Թուրքիա արտահանվող գազի գինը 2015 թվականի հունվարից Ռուսաստանի կողմից 6 տոկոսով նվազեցնելու, ինչպես նաև ներկայում մատակարարվող գազի ծավալը 3 մլրդ խոր.մ-ով ավելացնելու Ռուսաստանի արտահայտած պատրաստակամությունը:

Թուրքիայի վարչապետ Ահմեթ Դավութօղլուն թուրք-ռուսաստանյան հարաբերություններն անվանել է «պատմական», որոնք, նրա խոսքով, ապագայում կարող են դառնալ «օրինակելի»:

Թուրքական մամուլն ուշադրության է հրավիրել Պուտինի այն արտահայտությանը, որ թեև իրադարձությունների նկատմամբ երկու երկրի հայացքները կարող են տարբեր լինել, սակայն, «փոխադարձ շահն այնքան խորն է, որ այդ համագործակցությունը խորացնելուց բացի, այլ հնարավորություն չի մնում»:

Թուրքական մամուլը նշել է նաև Ղրիմի, Ուկրաինայի և Սիրիայի հարցերում Թուրքիայի և Մոսկվայի միջև հայացքների տարբերությունը: ՌԴ Նախագահը Ղրիմի և Սիրիայի հետ կապված հայտարարել է, որ ղրիմցի թաթարների իրավունքները չեն խախտվելու, իսկ Սիրիայի հարցում Ռուսաստանը կողմ է այնպիսի կառավարության ձևավորմանը, որում ներկայացված լինեն բոլոր քաղաքական ուժերը: