Հաց, կաթնամթերք, կարագ, ձեթ, ձավարեղեն. շուկայում թանկացումները նկատելի են

Ամանորին ընդառաջ, ինչպես նաև դրամի արժեզրկմամբ պայմանավորված՝ շուկայում գնաճ է նկատվում: Գների թանկացում, մասնավորապես, նկատում ենք հացի, կաթնամթերքի, կարագի, ձեթի, ձավարեղենի շուկայում:

ՏՄՊՊՀ մամուլի խոսնակ Գայանե Սահակյանը Լուրեր.com-ի թղթակցի հետ զրույցում ևս փաստեց, որ հանձնաժողովի մոնիթորինգի արդյունքները ևս փաստում են առկա գնաճը:

«Հանձնաժողովը գրավոր դիմել է կաթնամթերք արտադրող ընկերություններին: Երկու օրվա ընթացքում կստանանք տեղեկատվություն, երբ փաստաթղթերը լինեն հանձնաժողովում, ուսումնասիրություններ կիրականացվեն, որի արդյունքում էլ պարզ կդառնա, թե որքանով են համահունչ գնային բարձրացումները փոխարժեքի փոփոխությանը: Այս թանկացման վրա իհարկե մեծապես ազդում է դոլարի բարձրացումը, եթե կան այլ գործոններ՝ ուսումնասիրության ընթացքում պարզ կդառնան: Այս փուլում մեր խնդիրն է ուշադրության տակ պահել, վերահսկել, որպեսզի գնային բարձրացումները համահունչ լինեն տեղի ունեցող փոփոխություններին: Հանձնաժողովը գների կարգավորմամբ չի զբաղվում, մենք նման մեխանիզմ չունենք և չենք կարող որոշել՝ շուկայում որ ապրանքի գինը որքան պետք է լինի:

Մեր այն հարցին, թե արդյոք ուսումնասիրություններ կա՞ն, թե քանի տոկոս են կազմում բարձրացումները, ՏՄՊՊՀ խոսնակը չկարողացավ պատասխանել, քանի որ վերլուծությունները դեռևս շարունակվում են. «Այսպես չեմ կարող ասել, տարբեր ապրանքային շուկաներում տարբեր թվերի մասին է խոսքը, մի տեղ կա 2%, մի տեղ՝ 3%»:

Արդեն մի քանի օր է, ինչ հացի շուկայում ևս թանկացումներ են նկատվում, տեղ-տեղ հացը թանկացել է 20-30 դրամով: Գայանե Սահակյանին հարցրինք, թե այս շուկան ուսումնասիրվե՞լ է,  պատասխանեց. «Հացի շուկայում ուսումնասիրություն իրականացնելու որևէ օրենսդրական լծակ չունենք: Այդ շուկայում կան հարյուրավոր տնտեսվարողներ, այն համարվում է ցածր կենտրոնացվածության: Չկա որևէ մեկը, որը արտադրության և իրացվելիության ծավալով զբաղեցնի 33.3 %-ը: Հետևապես հացամթերքի շուկան հանձնաժողովի վերահսկողությունից դուրս է, մենք այդտեղ դիտանցում չենք կարող անել»: