Փորձագետները դրամի և գնաճի կայունացում են ակնկալում միայն գարնանը

Հայաստանում տեղի ունեցող գնաճը միջազգային զարգացումների հետևանք է' որոշակի ժամանակային լագով (տարբերությամբ): Եթե միջազգային շուկաներում նման երևույթներ սկսվել էին ավելի վաղ, ապա մեզ մոտ նոր են զգացվում դրամի արժեզրկման և պարենային շուկայի թանկացման երևույթները: Այս մասին լրագրողների հետ հանդիպման ժամանակ ասաց տնտեսագետ Վիլեն Խաչատրյանը' խոսելով տնտեսական ներկա իրադրության մասին: Նրա խոսքով' որոշակի բարելավում կարելի է ակնկալել այն ժամանակ, երբ թուլանան Ռուսաստանի դեմ կիրառվող պատժամիջոցները: «Այդ պատժամիջոցները թուլանալու են միայն մարտից սկսած: Իսկ մինչ այդ դրամը կշարունակի արժեզրկված մնալ: Նախկին տարիների փորձը ցույց է տալիս, որ եթե Ռուսաստանում ռուբլին արժեզրկվում է, օրինակ, 50 տոկոսով, ապա Հայաստանում դրամը ևս արժեզրկվում է, սակայն կիսով չափ ավելի քիչ: Նույն երևույթը նաև հիմա է, հետևաբար պետք է սպասել, մինչև ռուբլին կկայունանա»,- «Արմենպրես»-ի հաղորդմամբ' ասաց Խաչատրյանը: Նա նկատեց, որ տնտեսության մեջ դրամի արժեզրկումն առաջին հերթին անդրադառնալու է վարկառուների վրա, ովքեր ունեն դոլարային վարկեր, այսինքն' եթե անձը ունի 1000 դոլարի վարկ, ապա վճարելու է 100 դոլարով ավելի:

Խոսելով դրամի արժեզրկման ֆոնին տեղի ունեցող սպեկուլյատիվ երևույթների մասին' Խաչատրյանը նշեց, որ թեև մարդիկ փորձում են սպեկուլյատիվ միջոցներով ինչ-որ շահ ունենալ, սակայն վտանգում են իրենց գումարը: «Կենտրոնական բանկը, ինչպես և զգուշացրել էր, ունի փոխարժեքը կարգավորելու հնարավոր միջոցներ և այդ դեպքում տուժելու են այն մարդիկ, ովքեր փորձում էին օգտվել այս իրավիճակից»,- ասաց նա:

Սոցիոլոգ Ահարոն Ադիբեկյանն էլ խոսեց նման տնտեսական իրավիճակներում սպառողների սպասելիքների մասին' նշելով, որ Հայաստանում բնակիչներն իրենց եկամուտների մեծ մասը ծախսում են սննդի ձեռքբերման նպատակով, ինչն էլ նրանց համար ավելի ակնհայտ է դարձնում գնաճը: Սակայն նա վստահեցրեց, որ այս օրերին նկատվող թանկացումները հաղթահարելի մակարդակում են: «Մենք այն երկրների շարքում ենք, որտեղ շուկայական տնտեսությունը միջանկյալ փուլում է, այդ առումով, մենք դեռ ունենք սեփական սննդի և պարենային պաշարներ և միջազգային շուկաներում գնաճը մեզ համար համե մատաբար թեթև է լինում»,- ասաց նա:

Հայաստանում նոյեմբերի վերջին սկսվեց դրամի արժեզրկումը: Ներկայումս դոլարի նկատմամբ հայկական դրամն արժեզրկվել է ավելի քան 10 տոկոսով: