Պետդուման վավերացրեց ԵՏՄ-ին Հայաստանի միանալու պայմանագիրը

ՌԴ Պետդուման դեկտեմբերի 10-ին վավերացրել է Եվրասիական տնտեսական միությանը Հայաստանի միանալու մասին պայմանագիրը: Այդ որոշումը պատգամավորներն ընդունել են միաձայն, տեղեկացնում է «Արմենպրես»-ը՝ հղում անելով ՏԱՍՍ-ին:

Պայմանագիրը Ռուսաստանի, Բելառուսի, Ղազախստանի և Հայաստանի նախագահների կողմից ստորագրվել է Եվրասիական բարձրագույն տնտեսական խորհրդի հոկտեմբերի 10-ի նիստում: Այն բազային փաստաթուղթ է, որը բովանդակում է ՌԴ-, Բելառուսի և Ղազախստանի պայմանավորվածությունները ԵՏՄ-ին Հայաստանի միանալու պայմանների վերաբերյալ և նպատակամղված է ընդհանուր Միության գործունեության իրավական հիմքի ձևավորմանը:

Պայմանագրի համաձայն՝ Հայաստանը ԵՏՄ-ի լիիրավ անդամ է դառնում պայմանագրի ուժի մեջ մտնելու պահից, այսինքն՝ մասնակից բոլոր երկրներում վավերացման ընթացակարգերի ավարտից հետո, բայց 2015 թվականի հունվարի 1-ից ոչ շուտ:

Ինչպես Պետդումայի ամբիոնից հայտարարել է պալատի ԱՊՀ-ի գործերի, եվրասիական ինտեգրացման և հայրենակիցների հետ կապերի կոմիտեի նախագահ Լեոնիդ Սլուցկին, Եվրասիական միությանը Հայաստանի միանալը պատմական իրադարձություն է ԵՏՄ-ի ստեղծման ճանապարհին: «Հայաստանն առավելագույն կամք դրսևորեց զարգացման եվրոպական ուղիով ընթանալու համար: Դա պատմական որոշում է ԵՏՄ-ի ամբողջ կառույցի ձևավորման առումով»,- ընդգծել է նա:

Սլուցկու խոսքով՝ պայմանագիրը բովանդակում է վեց հոդված և հինգ հավելված, որոնք «ամբողջությամբ լուծում են հարցերի ամբողջ համալիրը, այդ թվում՝ ընդհանուր սահմանի բացակայության»: Նա նաև հայտնել է, որ մինչև դեկտեմբերի վերջն այդ պայմանագրի վավերացման հարցը պետք է քննարկվի Բելառուսի և Ղազախստանի խորհրդարաններում:

Ռուսաստանը, Բելառուսը և Ղազախստանը 2014 թվականի մայիսին 29-ին Աստանայում պայմանագիր են ստորագրել Եվրասիական տնտեսական միության մասին, որն ուժի մեջ կմտնի 2015 թվականի հունվարի 1-ից: