ԵՄ-ն պատրաստ է Հայաստանի հետ իրավական նոր փաստաթղթի շուրջ աշխատել. Տրայան Հրիսթեա

Նախորդ տարի Վիլնյուսում կայացած գագաթնաժողովից և Հայաստանի ու Եվրամիության համատեղ հուշագրի հրապարակումից հետո 2014-ին կողմերը շարունակել են բանակցությունները' հասկանալու, թե որ ոլորտներում և ինչ ձևաչափով կարելի է շարունակել համագործակցությունը: Հայաստանում Եվրամիության պատվիրակության ղեկավար, դեսպան Տրայան Հրիսթեայի գնահատմամբ' տարին բուռն էր, անցկացվել են քննարկումներ, երկխոսություններ, որոնց նպատակն է նոր համաձայնագիր ստորագրել, որտեղ կմատնանշվեն նախկին ձեռքբերումներն ու ապագայի տեսլականը:

«Վերանայվել է Հայաստանի հետ գործողությունների ծրագիրը և ներկայացվել նոր փաթեթ: ԵՄ-ն պատրաստ է Հայաստանի հետ իրավական նոր փաստաթղթերի ուղղությամբ աշխատել' հարգելով Հայաստանի նոր հանձնառությունները»,- դեկտեմբերի 16-ին լրագրողների հետ հանդիպման ժամանակ ասաց Հրիսթեան' հավելելով, որ այս անգամ ԵՄ-ն Արևելյան գործընկերների հետ կաշխատի անհատական սկզբունքով:

«Հայ գործընկերների հետ քննարկվել են համագործակցության տարբեր ոլորտներ, դրանց ձևաչափն ու շրջանակը: Ուսումնասիրությունների երկրորդ փուլը տեղի կունենա դեկտեմբերին, որից հետո համագործակցության հաջորդ հենակետը կլինի հունվարին Բրյուսելում անցկացվելիք Հայաստան-Եվրամիություն համագործակցության խորհրդի հաջորդ նիստը»,- ասաց Հրիսթեան' հավելելով, որ քննարկվելիք ոլորտները բազմաթիվ են' մարդու իրավունքների պաշտպանություն, արտաքին առևտուր, դատաիրավական համակարգի բարեփոխումներ, ընտրական համակարգ, խոսքի ազատությանն ու տեղեկատվությանն առնչվող խնդիրներ, քաղաքացիական հասարակության գործունեություն, խտրականության դեմ պայքար, կրոնի և դավանանքի ազատություն:

«Այս տարի եղել են կարևոր զարգացումներ, համագործակցություն տարբեր ոլորտներում, ԵՄ-ն և Հայաստանը երկուստեք պատրաստ են շարունակելու հարաբերությունները առևտրի և հետաքրքրություն ներկայացնող այլ ոլոտներում' հենվելով միասնական արժեհամակարգի վրա: Այս համագործակցությունը պայմանավորված է նաև այն հանգամանքով, որ համաձայն ՀՀ վիճակագրական ծառայության, երկրի արտաքին առևտրում ԵՄ-ն առաջին հորիզոնականում է, արտահանման և ներմուծման ցուցանիշով' նույնպես: Ամենամեծ ներդրողը Հայաստանում ԵՄ-ն է' 52 տոկոս, աջակցության խոշորագույն արտաքին գործընկերը նույնպես ԵՄ-ն է' ոչ միայն խոստացված, այլև փաստացի տրամադրված գումարների առումով»,- ասաց Հրիսթեան:

Հայաստանը բազմիցս հայտարարել է, որ ԵՏՄ-ի հետ ինտեգրացիոն քաղաքականությունը չի կարող ազդել Եվրամիության հետ համագործակցությանն ու ԱլԳ շրջանակում Եվրամիության ասոցացմանը: Հայաստանը Եվրամիությանը կներկայացնի ոլորտների և ծրագրերի այն փաթեթը, որոնք չեն խոչընդոտի համագործակցությանը ինտեգրացիոն նոր զարգացումների պարագայում: