Հայաստանի տնտեսությունը դեռ ի վիճակի է կլանել գնաճային ճնշումները

Հայաստանում գնաճը ցածր մակարդակի վրա է եղել մինչև նոյեմբեր, ինչը նպաստել է մակրոտնտեսական կայուն միջավայրի ձևավորմանը: Ներկայումս, երբ դրամի արժեզրկումը և տնտեսական մյուս զարգացումները խթանել են գնաճի աճի տեմպերը, Հայաստանի տնտեսությունը դեռևս կարող է կլանել այդ գնաճային ճնշումները: Այս մասին հայտարարեց Արժույթի միջազգային հիմնադրամի երևանյան գրասենյակի տնօրեն Թերեսա Դաբան Սանչեսը' խոսելով վերջին շրջանում արժութային շուկայի զարգացումների և գնաճի վերաբերյալ:

«Հայաստանի մակրոտնտեսական կայունության արդյունք էր, որ գնաճը բավական երկար ժամանակ կայուն մակարդակում էր: Սակայն նոյեմբերին արդեն սկսվեցին թանկացումներ, և ամսվա վերջին գրանցվեց 2.6 տոկոս գնաճ: Երբ դրանից հանում ենք գնաճի տատանողական տարրերը, ապա մինչ նոյեմբեր գնաճը բավականին ցածր է եղել: Սրանից հետևություն եմ անում, որ տնտեսությունն ի վիճակի կլինի կլանել այս ցնցումը»,- «Արմենպրես»-ի հաղորդմամբ' ասաց Սանչեսը:

ԱՄՀ ներկայացուցիչը զուգահեռներ անցկացրեց Ռուսաստանի հետ, որտեղ ևս ազգային արժույթն արժեզրկվում է: «Այնտեղ գնաճը նախորդ ամիսներին 8-9 տոկոսի էր հասնում և տնտեսությունը չի կարողանում կլանել արժեզրկման հետևանքները: Կա մտավախություն, որ այնտեղ գնաճը կարող է երկնիշ թվի հասնել: Հենց դրա համար էլ երեկ ՌԴ կենտրոնական բանկը բարձրացրեց վերաֆինանսավորման տոկոսադրույքը»,- ընդգծեց նա:

Հայաստանի Կենտրոնական բանկի կանխատեսումների համաձայն' 12-ամյա գնաճը 2014 թվականին կլինի կանխատեսվող մակարդակում' կազմելով 4%+1.5 տոկոսային կետ: Սակայն ներկայումս պարենային ապրանքների շուկայում բավականին բարձր գնաճ է: Փորձագիտական դաշտում հնչում են սպառողական շուկայում մինչև 10-15 գնաճի մասին գնահատականներ: