Հարավամերիկյան ընդհանուր շուկայի պետությունները մտադիր են զարգացնել համագործակցությունը ԵՏՄ-ի հետ

Հարավամերիկյան ընդհանուր շուկայի պետությունները (ՄԵՐԿՕՍՈՒՐ) մտադիր են զարգացնել համագործակցությունը Եվրասիական տնտեսական միության հետ: Այդ մասին, ինչպես տեղեկացնում է «Արմենպրես»-ը, ասված է կազմակերպության գագաթնաժողովի մասնակիցների համատեղ հայտարարության մեջ, որն ընթանում է Արգենտինայի Պարանա քաղաքում՝ Էնթրե-Ռի ոս նահանգի մայրաքաղաքում:

Պետությունների ղեկավարները «նշել են ՄԵՐԿՕՍՈՒՐ-ի և Եվրասիական տնտեսական հանձնաժողովի կողմից կատարված հիանալի աշխատանքը, ինչպես նաև միմյանց շնորհավորել են տնտեսության և առևտրի ոլորտում համագործակցության վերաբերյալ հուշագրի տեքստի համաձայնեցման հարցում ձեռք բերված հաջողությունների կապակցությամբ, որը կստորագրվի այն բանից հետո, երբ 2015 թվականի հունվարի 1-ից աշխատանքը կսկսի Եվրասիական տնտեսական միությունը»:

Ընթացիկ տարվա նոյեմբերի վերջին Եվրասիական տնտեսական հանձնաժողովի առևտրի գծով կոլեգիայի անդամ (նախարար) Անդրեյ Սլեպնյովը, որը գլխավորում էր բանակցություններն արգենտինացի գործընկերների հետ, ՏԱՍՍ-ին հայտնել է, որ «ընդհանուր ըմբռնում է ձեռք բերվել առաջիկայում երկու բլոկների միջև իրավաբանորեն պարտավորեցնող լիաֆորմատ համաձայնագրերի նախապատրաստման անհրաժեշտության հարցում, որոնք արդեն նոր իրավական հիմք կստեղծեն ՄԵՐԿՕՍՈՒՐ-ի և ԵՏՄ-ի անդամ պետությունների միջև առևտրի համար»:

Նա նաև նշել է ինտեգրացիոն երկու միավորումների՝ ՄԵՐԿՕՍՈՒՐ-ի (Արգենտինա, Բրազիլիա, Վենեսուելա, Պարագվայ և Ուրուգվայ) և ԵՏՄ-ի հսկայական ներուժը, որոնք միասին ներկայացնում են համաշխարհային տնտեսության ավելի քան 7 տոկոսը և ունեն ավելի քան կես միլիարդի հասնող բնակչություն: