Ադրբեջանի իշխանությունը կորցրել է բոլոր հենարաններն արտասահմանում. «Ազադլըգ»

Ադրբեջանի իշխանությունը կորցրել է իր բոլոր հենարաններն արտասահմանում: Ադրբեջանի իշխանությանն արվող աջակցությունից հրաժարվում է նաև նրա վերջին հույս Իսրայելը, ինչի վկայություն են հանդիսանում իսրայելական Haaretz և Jerusalem Post թերթերում Ադրբեջանի հետ կապված քննադատական հոդվածները և Ադրբեջանի նախագահի մամուլի քարտուղար Ազեր Գասիմովի կողմից անմիջական արձագանքը դրանց ու Իսրայելի հասցեին հնչեցրած մեղադրանքները: Այս մասին, ինչպես հաղորդում է «Արմենպրես»-ը, հայտնում է «Ազադլըգ» թերթը:

Իսրայելի հեղինակավոր Haaretz և Jerusalem Post թերթերն անցյալ շաբաթ հոդվածներ էին հրապարակել Ադրբեջանում մարդու իրավունքների աղետալի վիճակի, իրավապաշտպանների ձերբակալության, Ադրբեջանի իշխանության ռեպրեսիվ քաղաքականության, Արևմուտքից հեռանալով' Ռուսաստանի կողքին տեղ զբաղեցնելու ու դրանով Թել Ավիվ-Բաքու հարաբերությունները ռիսկի ենթարկելու մասին, և քննադատություններ հնչեցրել Ադրբեջանի իշխանության հասցեին:

«Վերջին շրջանում, երևում է, Ադրբեջանը փոխել է արևմտամետ արտաքին քաղաքականությունը և ուղղությունը թեքել դեպի Ռուսաստան»,- նշել են իսրայելական հեղինակավոր թերթերը:

Ազեր Գասիմովն այդ առնչությամբ հայտարարել էր, որ Իսրայելի իշխանությանը մոտ կանգնած այդ թերթերում Ադրբեջանի հետ կապված քննադատական նյութերի հրապարակումը «հակաադրբեջանական արշավ իրականացնող որոշ ուժերի պատվեր է, որոնք դեմ են Ադրբեջանում առկա զարգացման գործընթացներին և Ադրբեջանի ու Իսրայելի մերձեցմանը»:

Անդրադառնալով Ազեր Գասիմովի այդ հիստերիկ արձագանքին' «Ազադլըգ»-ը գրում է, որ իսրայելական հեղինակավոր թերթերում Ադրբեջանի հասցեին քննադատական հոդվածների հրապարակումը ցույց է տալիս, որ Իլհամ Ալիևի իշխանության և Թել Ավիվի միջև հարաբերությունները նույնպես խարխլվել են:

«Երևում է' Արևմուտքի հետ Ադրբեջանի իշխանության բախման ու դիմակայության խորացումն Իսրայելին դրդել է վերանայել Ալիևների հետ համագործակցությունը, ինչի մասին նա ուղերձ է հղում Haaretz-ի և Jerusalem Post-ի միջոցով: Թերթին հասած տեղեկություններով, արդեն Ադրբեջանի իշխանական ճամբարում ևս հասկանում են, որ Իլհամ Ալիևը կորցրել է արտասահմանում իր բոլոր հենարանները: Հատկապես Իսրայելից եկած հարվածն իրարանցում է առաջացրել իշխանական ճամբարում, քանի որ Ադրբեջանի իշխանությունը մշտապես զգում էր այդ երկրի աջակցությունը և օգտվում հրեական լոբբիստակա ն կազմակերպությունների օգնությունից: Բայց այժմ երևում է, որ Իսրայելն էլ է ձեռք քաշում Ալիևի իշխանությունից»,- գրում է «Ազադլըգը»: