Ադրբեջանի իշխանությունն անհանգստացած է հեղափոխությամբ. The New York Times

Համաշխարհային Մամուլ 30 Դեկտեմբեր, 2014 1:34

Ադրբեջանի նախագահ Իլհամ Ալիևի կողմնակիցները զգուշացնում են, որ արտասահմանից դրամաշնորհներ ստացող և ֆինանսավորվող կազնակերպությունները պատրաստվում են Բաքվում «արաբական գարնան» նման հեղափոխություն կատարել կամ էլ Ուկրաինայում եղածի նման փողոցային ցույցերով տապալել իշխանությունը: Այս մասին, ինչպես հաղորդում է «Արմենպրես»-ը, հայտնում է The New York Times թերթը` նշելով, որ Ադրբեջանի իշխանությունն անհանգստացած է հեղափոխությամբ:

Թերթը գրում է, որ շաբաթվա վերջին Բաքվում «Ազատություն» ռադիոկայանի լրագրողներին 12 ժամով բերման են ենթարկել հարցաքննության: Թերթը հատուկ նշում է, որ ռադիոկայանի «Աշխատանքից հետո» ծրագրի հաղորդավար Քամրան Մահմուդովին ոստիկանները տանից բերման են ենթարկել գիշերանոցով և ոտաբոբիկ: Թերթը հայտնում է նաև, որ Ադրբեջանի կառավարությունը մի շարք ոչ կառավարական կազմակերպությունների անհեթեթ կերպով մեղադրում է Հայաստանի հետ համագործակցության մեջ:

Ադրբեջանի գլխավոր դատախազության ծանր հանցագործությունների հետաքննչական վարչությունը կիրակի առավոտյան հարցաքննության է տարել ռադիոկայանի բոլոր աշխատակիցներին, անգամ երկու հավաքարարներին: Հարցաքննությունից հետո Meydan TV-ին տված հարցազրույցում Քամրան Մահմուդովն ասել է, որ քննիչն իրեն հարցեր է ուղղել` կապված հասարակական կազմակերպությունների վերաբերյալ բացված քրեական գործի և «Ազատություն» ռադիոկայանի գործունեության հետ:

Ռադիոկայանի բոլոր աշխատակիցներն ազատ են արձակվել միայն քննության գաղտնիքը չբացահայտելու վերաբերյալ ստորագրություն տալուց հետո: Գլխավոր դատախազի առաջին տեղակալի որոշմամբ` ռադիոկայանի փաստաբան Յալչին Իմանովը հեռացվել է աշխատակիցների իրավունքների պաշտպանությունից: Փաստաբանը նշել է, որ «Ազատություն» ռ/կ-ում իրականացված խուզարկությունը որևէ իրավաբանական կապ չունի հասարակական կազմակերպությունների դեմ բացված քրեական գործի հետ:

Ադրբեջանի գլխավոր դատախազության ծանր հանցագործությունների գծով հետաքննչական վարչության մի խումբ աշխատակիցներ դեկտեմբերի 27-ին ժամը ժամը 10:30-ին ներխուժել են «Ազատություն» ռադիոկայանի ադրբեջանական ծառայության գրասենյակ և խուզարկություն անցկացրել:

Գրասենյակում անջատվել են հեռախոսները, համակարգիչները և Ինտերնետը: Աշխատակիցներին թույլ չեն տվել մոտենալ իրենց համակարգիչներին: Դատախազության աշխատակիցները բռնագրավել են գրասենյակի համակարգիչները, բոլոր փաստաթղթերը և գույքը և կնքել գրասենյակի դուռը:

Բաքվում «Ազատություն» ռադիոկայանի նկատմամբ ճնշումը դատապարտել են ԱՄՆ պետքարտուղարությունը, ԵԱՀԿ-ը և Եվրոպայի Խորհուրդը: