«Վաշինգտոն թայմս»-ն Էրդողանին պատկերող ծաղրանկար է հրապարակել (լուսանկար)

Թուրքիայի նախագահ Ռեջեփ Թայիփ Էրդողանի կողմից 16-ամյա աշակերտի դեմ դատական գործի հարուցումը ծաղրանկարի թեմա է դարձել ամերիկյան ծաղրանկարիչների համար:

Ինչպես հաղորդում է «Արմենպրես»-ը' վկայակոչելով թուրքական Demokrathaber.net-ը, ամերիկյան հայտնի «Վաշինգտոն թայմս» պարբերականի ծաղրանկարիչ Անն Թելանեսը պատկերել է այս միջադեպը:

Ծաղրանկարում պատկերված է, թե ինչպես է Էրդողանը բանտարկում նորածին երեխայի, ով համարձակվել է «լեզու հանել»:

«Վաշինգտոն թայմս»-ի ծաղրանկարիչ Անն Թելանեսը 2001 թվականին «Քաղաքական ծաղրանկար» անվանակարգում արժանացել է Պուլիտցերյան մրցանակի:

Թուրքիայի նախագահ Ռեջեփ Թայիփ Էրդողանը շարունակում է լռեցնել և պատժել բոլոր այն անձանց, ովքեր համարձակվում են իր հասցեին որևէ քննադատական խոսք հնչեցնել: Էրդողանի կամքով' Քոնիայում ոստիկանները դպրոց գնալու ճանապարհին ձերբակալել էին 16-ամյա աշակերտի: Մ. Է. Ա.-ն մեղադրվում էր Էրդողանի հասցեին վիրավորանք հնչեցնելու մեջ: Անչափահասը տարվել էր Քոնիայի Առաջին ատյանի քրեական դատարան: Հաղորդվում է, որ ավելի վաղ Քոնիայում տեղի ունեցած ցույցերից մեկի ժամանակ աշակերտը հայտարարել էր. «Որպես ժողովրդական աշակերտներ' հայտարարում ենք, որ թալանի, կաշառակերության, գողության գլուխ հանդիսացող Էրդողանին տեսնում ենք որպես ոչ թե մեր նախագահ, այլ ապօրինի պալատի գող տեր»: Եթե Մ. Է. Ա.-ի դեմ հարուցվեր քրեական գործ, ապա համաձայն Թուրքիայի քրեական օրենսգրքի 299-րդ հոդվածի' 16-ամյա աշակերտը նախագահին վիրավորելու համար կարող էր դատապարտվել 1-4 տարի ազատազրկման: Ավելի ուշ աշակերտը ազատ էր արձակվել: