Հայաստանի արտաքին պարտքը կազմել է ավելի քան 4.6 մլրդ դոլար

Հայաստանի մաքուր արտաքին պարտքը 2014թ. երրորդ եռամսյակի ընթացքում նվազել է 101 մլն 320 հազար դոլարով և կազմել 4 մլրդ 600 մլն 280 հազար դոլար: Ինչպես «Արմենպրես»-ին տեղեկացրին ՀՀ ազգային վիճակագրական ծառայությունից, 2014թ. սեպտեմբերի վերջի դրությամբ ՀՀ համախառն արտաքին ակտիվները կազմել են 3 մլրդ 705 մլն 980 հազար դոլար և 2014թ. երրորդ եռամսյակի ընթացքում նվազել են 82.85 մլն դոլարով:

Համախառն արտաքին պարտքի 39.88 տոկոսը գոյացել է պետական կառավարման համակարգում, 7.02 տոկոսը' Կենտրոնական բանկում, 27.04 տոկոսը' ավանդային կազմակերպություններում, բացի Կենտրոնական բանկից, 16.81 տոկոսը' մասնավոր հատվածում, իսկ 9.26 տոկոսը' տնտեսության տարբեր հատվածների կազմակերպությունների կողմից ստացված ուղղակի ներդրումներն են՝ միջֆիրմային վարկերի տեսքով: