Համաշխարհային բանկն իջեցրել է գլոբալ տնտեսության աճի կանխատեսումները

Համաշխարհային բանկը 2015 թվականի համար գլոբալ տնտեսության աճի տեմպերի կանխատեսումը 3,4 տոկոսից իջեցրել է մինչև 3 տոկոս, իսկ 2016 թվականի համար՝ 3,5 տոկոսից մինչև 3,3 տոկոս: Այդ մասին, ինչպես տեղեկացնում է «Արմենպրես»-ը, ասված է բանկի «Գլոբալ տնտեսական հեռանկարները» հետազոտության մեջ:

Վերլուծաբանների գնահատումների համաձայն՝ 2017 թվականին գլոբալ տնտեսության աճը կդանդաղի մինչև 3,2 տոկոս:

2014 թվականին համաշխարհային տնտեսության աճը, ՀԲ-ի գնահատմամբ, կազմել է 2,6 տոկոս:

Բանկի վերլուծաբանների կարծիքով՝ զարգացող երկրների տնտեսությունների աճը 2014 թվականի 4,4 տոկոսից 2015 թվականին կհասնի 4,8 տոկոսի: Սակայն կանխատեսումը նույնպես իջեցվել է. ավելի վաղ այս տարի 5,4 տոկոս աճ էր սպասվում:

«Եվս մեկ հիասթափեցնող տարվանից հետո, որպիսին 2014 թվականն էր, զարգացող երկրներն այս տարի պետք է իրենց տնտեսական աճի տեմպերի որոշ արագացում ունենան, ինչին մասնակիորեն նպաստում են նավթի չափավոր գները, ԱՄՆ-ի տնտեսության ուժեղացումը, գլոբալ ցածր տոկոսադրույքների պահպանումը և զարգացող շուկայով մի քանի խոշոր երկրներում զսպող գործոնների թուլացումը»,- ասված է զեկույցում:

Ինչպես նշում է ՌԻԱ «Նովոստին», բանկը 2016 թվականին զարգացող երկրներում աճի տեմպերի կանխատեսումը 5,5 տոկոսից իջեցրել է մինչև 5,3 տոկոս: 2017 թվականին այդ ցուցանիշը կհասնի 5,4 տոկոսի: