Հայաստանի էներգետիկ ոլորտի աճը փոքր է, կորուստները` բավական մեծ

Հայաստանում էլեկտրաէներգիայի արտադրության ոլորտում դեռևս կան չլուծված խնդիրներ, որոնց հետևանքով շարունակում է բարձր մնալ կորուստների ծավալը, իսկ արտադրությունը զգալի աճ չի գրանցում: Տարեկան ամփոփիչ ասուլիսի ժամանակ ՀՀ էներգետիկայի և բնական պաշարների նախարար Երվանդ Զախարյանը նշեց, որ ֆինանսական միջոցների անարդյունավետ օգտագործման հետևանքով էլեկտրաէներգիա արտադրող ընկերություններում առաջացել են շուրջ 23.8 մլրդ դրամի պարտքեր:

«Ընկերությունների առկա ֆինանսական վիճակի ուսումնասիրությունը ցույց է տալիս, որ համակարգում կան չլուծված խնդիրներ: Օրինակ` 2012-2014 թթ. մարժային տարվա ոչ իրատեսական հաշվեկշիռը, Հայաստանի ատոմակայանի լրացուցիչ կանգառը, ջրի սակավության հետևանքով հիդրոէլեկտրակայանների թերի արտարդությունը և այլն»,- «Արմենպրես»-ի փոխանցմամբ, ասաց նախարարը: Երվանդ Զախարյանի խոսքով` ստեղծված իրավիճակը պայմանավորված է սակագների հիմքում դրված էլկտրաէներգիայի արտադրության և սպառման կառուցվածքի շեղումներով, ինչպես նաև կառ ավարման խնդիրներով:

Խոսելով էներգահամակարգում կորուստների մասին` Երվանդ Զախարյանը նշեց, որ փաստացի կորուստները բաշխիչ ցանցում նվազել են` կազմելով 799 մլն կվտ/ժ կամ արտադրության ծավալի14 տոկոսը, նախորդ տարվա 14.1 տոկոսի փոխարեն: «Այս ցուցանիշը դեռևս չի բավարարում մեր պահանջները, և հետագա աշխատանքները ուղղված են լինելու կորուստների նվազեցմանը»,- ասաց նա:

Նախարարը տեղեկացրեց, որ կլիմայի ոչ բարենպաստ փոփոխությունների հետևանքով տարեկան էներգահաշվեկշռում շարունակում է նվազել հիդրոէներգետիկայի մասնաբաժինը: «Շուրջ 10 տոկոսով նվազել է ՀԷԿ-երում էլեկտրաէներգիայի արտադրության ծավալը»,- ասաց Զախարյանը: Նա նկատեց, որ նախորդ տարվա համեմատ որոշակի ավելացել է էլեկտրաէներգիայի սպառման ծավալը: «Անցած տարվա 11 ամսվա ընթացքում ներքին շուկայում սպառվել է 4 մլրդ 915.83 մլն կվտ/ժ, որը փոքր-ինչ գերազանցում է նախորդ տարվա ցուցանիշը»,- ասաց էներգետիկայի նախարարը:

2014 թվականի ընթացքում Հայաստանում արտդրվել է 7 մլրդ 750 մլն կվտ/ժ էլեկտրաէներգիա, որը 0.52 տոկոսով ավելի է նախորդ տարվա 7 մլրդ 710 մլն կվտ/ժ էլեկտրաէներգիայից: Նախորդ տարի էլեկտրաէներգիայի արտահանման ծավալը կազմել է 1 մլրդ 305.3 մլն կվտ/ժ, որը հավասար է 2013 թվականի ցուցանիշին: