ՀԷՑ-ը մեծ պարտքեր է կուտակել բանկերի և էլեկտրաէներգիա արտադրողների նկատմամբ

«Հայաստանի էլեկտրական ցանցեր» ՓԲԸ-ի պարտավորությունները բանկերի նկատմամբ գերազանցել են 220 մլն դոլարը, իսկ պետական ընկերությունների՝ առևտրային բանկերից ներգրաված վարկերը կազմում են 10,8 մլրդ դրամ: Ընդ որում, վարկերի սպասարկման հիմնական ծախսերը ներառված չեն սակագներում, ինչն իր հերթին լրացուցիչ բեռ է ընկերությունների համար:

Այս մասին լրագրողների հետ հանդիպման ժամանակ տեղեկացրեց ՀՀ էներգետիկայի նախարար Երվանդ Զախարյանը՝ խոսելով համակարգի խնդիրների մասին: «ՀԷՑ-ը արտադրող կայանների նկատմամբ ևս մեծ պարտքեր է կուտակել: 2015թ. հունվարի 1-ի դրությամբ միայն պետական մասնակցությամբ ընկերություններին պարտքը կազմել է 15,8 մլրդ դրամ, այդ թվում ժամկետանց պարտքը՝ 7,8 մլրդ դրամ»,- «Արմենպրես»-ի հաղորդմամբ՝ ասաց նա:

Երվանդ Զախարյանը տեղեկացրեց, որ նախնական տվյալներով, 2014թ. օգոստոսի 1-ից գործող սակագների հիմքում վերցված պլանային էներգահաշվեկշռի շեղումների հետևանքով, մինչև մարժային տարվա ավարտը (2015թ. հուլիսի 31-ը) ընկերությունը չի ստանա 4,2 մլրդ. դրամ:

Նախարարի խոսքով, գործող սակագները հիմնականում չեն արտացոլում ընկերություններին անհրաժեշտ ծախսերը՝ ուղղված շահագործմանն ու անվտանգություն ապահովող միջոցառումներին: «Որոշ ընկերություններում պլանավորվում են ամորտիզացիա և շահույթ՝ այն դեպքում, երբ մյուս ընկերություններում դրանք չեն նախատեսվում: Արդյունքում մի ընկերությունը աշխատում է վնասով, մյուսը՝ գերշահույթով»,- ընդգծեց նա:

Նախարարը հիշեցրեց, որ անցած տարիների ընթացքում սեփական կարիքների համար ունենալով բավականին մեծ թերֆինանսավորում՝ համակարգից փոխառությունների տեսքով դուրս է փոխանցվել շուրջ 31 մլրդ դրամ՝ «Նաիրիտ գործարան» և «Վանաձոր քիմպրոմ» ՓԲԸ-ներին՝ աշխատավարձերի վճարման նպատակով:

2013 թվականի արդյունքներով՝ համակարգի պետական ընկերությունների գործունեությունը եղել է վնասաբեր, ընդհանուր վնասը կազմել էր 12,1 մլրդ. դրամ: