Ահաբեկիչները փորձել են «երկրորդ Փարիզի» վերածել Բելգիան. ԶԼՄ-ներ

Ահաբեկիչները, որոնցից երկուսը ոչնչացվել են, իսկ մեկը ձերբակալվել է Բելգիայում, հինգշաբթի նախատեսել էին ահաբեկչական հարձակումներ, որոնք կարող էին դառնալ «երկրորդ Փարիզը»: Այս մասին հայտնել է ՌԻԱ Նովոստին՝ հղում անելով երկրի արդարադատության նախարարության աղբյուրին:

Հինգշաբթի երեկոյան, Բելգիայի իրավապահ մարմիններն իրականացրել են հակաահաբեկչական գործողություն, որի ընթացքում երկու կասկածյալ ահաբեկիչներ են վերացվել, մեկը՝ ձերբակալվել:

Երկրի որոշ շրջաններում բարձրացել է ազգային անվտանգության սպառնալիքի մակարդակը:

Ինչպես հայտնել է Բելգիայի դատախազության ներկայացուցիչ Էրիկ վան դեր Զիպտը, ստուգումներ են իրականացվել Սիրիայից վերադարձած կասկածվող ահաբեկիչների նկատմամբ, որոնք ծրագրում էին «զանգվածային գրոհներ», նրանց մասնակցությունը Փարիզի ահաբեկչական հարձակումներում դեռ չի ապացուցվել:

«Կանխվել է երկրորդ Փարիզը: Մի քանի ժամ էր մնացել, մինչև մեր երկրում հարձակումների իրականացումը»,- հայտնել է աղբյուրը:

Ըստ տեղական ԶԼՄ-ների՝ հակաահաբեկչական գործողության ընթացքում ոստիկանությունն առգրավել էր զենք, պայթուցիկ նյութեր և «Իսլամական պետություն» արմատական խմբավորմանը պատկանող մի քանի դրոշներ, որը գործում է հիմնականում Իրաքում և Սիրիայում: