Թուրքական մամուլի անդրադարձը Էրդողանին ուղղված ՀՀ Նախագահի պատասխան նամակին

Թուրքական մամուլն անդրադարձել է Դարդանելի մարտերի 100-ամյակի կապակցությամբ պետականորեն նշվելիք միջոցառումներին մասնակցելու համար Թուրքիայի Նախագահի հրավերին ՀՀ Նախագահ Սերժ Սարգսյանի տված պատասխանին:

Ինչպես հաղորդում է «Արմենպրես»-ը, թուրքական իշխանամետ մամուլը չի ներկայացրել ՀՀ Նախագահի նամակի ամբողջական տեքսը, այլ միայն ՀՀ Նախագահի այն խոսքերը, որ հայերի մոտ ընդունված չէ առանց սեփական հրավերի պատասխանը ստանալու, հյուրընկալվել հրավիրողին: Որոշ ԶԼՄ-ներ նշել են, որ ՀՀ Նախագահը հատուկ շեշտել է, որ Թուրքիայի կողմից Գալիպոլիի ճակատամարտի 100-ամյակի օրը ապրիլի 24-ին նշելը դիտավորյալ է ընտրված, որի նպատակը Հայոց ցեղասպանության 100-րդ տարելիցի միջոցառումներից միջազգային հանրությա ն ուշադրությունը շեղելն է:

Թեմային անդրադարձած մեծ թվով թուրքական ԶԼՄ-ներից ՀՀ Նախագահի պատասխան նամակի ամբողջական տեքստը ներկայացրել են T24, HaberTurk լրատավական կայքերը: Թուրքական որոշ ԶԼՄ-ներ, ամենայն հավականությամբ՝ ոչ պատահաբար, աղավաղել են ՀՀ Նախագահի՝ «Հարգելի նախագահ» դիմելաձեը՝ թուրքերեն տարբերակում այն դարձնելով «Սիրելի նախագահ»:

Թուրքական ԶԼՄ-ների՝ թեմային վերաբերմունքը կարելի է ենթադրել նրանց ներկայացրած վերնագրերից՝ «Սարգսյանի կոշտ պատասխանը Էրդողանին», «Հայաստանի պատասխանը. առաջինը թող նա գա», «Առանց պատասխան ստանալու, հյուր չեն գնում», «Կտրուկ պատասխան Էրդողանին Սարգսյանից» և այլն:

ՀՀ Նախագահի՝ Էրդողանին հղած պատասխան նամակին անդրադարձել է նաև BBC-ին: «ՀՀ նախագահը Գալիպոլի չի գնա» վերտառությամբ հոդվածում ասվում է. «ՀՀ նախագահ Սերժ Սարգսյանը մերժել է Գալիպոլիի ճակատամարտի հարյուրամյակի հիշատակի միջոցառումներին մասնակցելու մասին իր թուրք գործընկերոջ Ռեջեփ Թայիփ Էրդողանի հրավերը, առաջարկելով նախ 1915 թվականի հայերի կոտորածը ճանաչել Ցեղասպանություն»: BBC-ին անդրադարձել է ՀՀ Նախագահի պատասխանի ամբողջ բովանդակությանը:

Գալիպոլիի (Չանաքքալե) ճակատամարտը սկսվել է 1915 թվականի մարտի 18-ին: Գալիպոլիում ավստրալական և նորզելանդական զորամիավորումներն ափ են իջեցվել 1915 թվականի ապրիլի 25-ին: Գալիպոլիի գործողությունները համարվում են Առաջին աշխարհամարտի խոշորագույն մարտերից մեկը, որը տեղի ունեցավ այն ժամանակվա Բրիտանիայի ծովուժերի նախարար Ուինսթոն Չերչիլի նախաձեռնությամբ՝ նպատակ հետապնդելով գրավել Դարդանելի և Բոսֆորի նեղուցները և Կոնստանդնուպոլիսը, որպեսզի ճանապարհ բացվի դեպի դաշնակից Ռուսաստան և Օսմանյան կայսրությանը պարտադրել խաղաղության: Այդ գործողությունները տևել են մինչև 1916 թվականի հունվար և ավարտվել Անտանտի պարտությամբ: