ԱՄՀ-ն աշխարհում տնտեսական աճի տեմպերի դանդաղում է կանխատեսում

Արժույթի միջազգային հիմնադրամն աշխարհում տնտեսական աճի տեմպերի կանխատեսումը 2015 թվականին իջեցրել է մինչև 3,5 տոկոս, իսկ եկող տարի՝ մինչև 3,7 տոկոս: Դրանցից յուրաքանչյուրը 0,3 տոկոսով ցածր է այն ցուցանիշներից, որոնք սպասվում էին անցյալ տարվա հոկտեմբերին: Ինչպես տեղեկացնում է «Արմենպրես»-ը, այս թվերը նշված են համաշխարհային էկոնոմիկայի վիճակի և մոտակա հեռանկարների վերաբերյալ նոր զեկույցում, որի շնորհանդեսը հունվարի 20-ին անցկացվել է Պեկինում:

Դեպի նվազեցման կողմն են վերանայվել աշխարհի բոլոր առաջատար տնտեսությունների համար արված կանխատեսումները, բացառությամբ ԱՄՆ-ի: Նորացված փաստաթղթի հեղինակներն այժմ ԱՄՆ-ի համար 2015 և 2016 թվականներին կանխատեսում են համապատասխանաբար 3,6 և 3,3 տոկոս աճ: Եվրոյի գոտու համար աճի նոր ցուցանիշները կազմել են 1,2 և 1,4 տոկոս, Գերմանիայի համար՝ 1,3 և 1,5 տոկոս, Ֆրանսիայի համար՝ 0,9 և 1,3 տոկոս, Իտալիայի համար՝ 0,4 և 0,8 տոկոս: Մեծ Բրիտանիայում աճի սպասվող տեմպերը փոքր-ինչ ավելի բարձր են՝ 2,7 և 2,4 տոկոս, Ճապոնիայում՝ 0,6 և 0,8 տոկոս:

ԱՄՆ-ի հետ միասին համաշխարհային աճի լոկոմոտիվներ են մնում BRICS-ի երկրները: Չինաստանում զեկույցի կազմողները 2015 և 2016 թվականներին սպասում են 6,8 և 6,3 տոկոս աճ, Հնդկաստանում՝ 6,3 և 6,5 տոկոս, Հարավաֆրիկյան Հանրապետությունում՝ 2,1 և 2,5 տոկոս, Բրազիլիայում՝ 0,3 և 1,5 տոկոս աճ: Ընդսմին ՉԺՀ-ի համար հոկտեմբերյան կանխատեսման համեմատությամբ սպասումներն այս տարվա համար իջեցված են 0,3 տոկոսով, եկող տարվա համար՝ 0,5 տոկոսով: Ռուսաստանում անկում է կանխատեսվում ՀՆԱ-ի 3,0 և 1,0 տոկոսով:

ՏԱՍՍ-ի փոխանցմամբ՝ ԱՄՀ-ն սպասում է, որ այս տարի աշխարհի շուկաներում նավթի միջին գինը բարելի դիմաց կկազմի 56,73 դոլար, իսկ 2016 թվականին՝ 63,88 դոլար:

Պարզաբանվում է, որ նկատի է առնվում Բրենտ, Դուբայ և Արևմտյան Տեխաս նավթի միջին թվաբանական գինը: Համեմատության համար ասված է, որ 2014 թվականին նավթի միջին գինը բարելի դիմաց կազմել է 96,26 դոլար: