Մերկել-Ալիև հանդիպումը լարված է անցել. Deutshce Welle-ի անդրադարձը

Համաշխարհային Մամուլ 22 Հունվար, 2015 13:32

Ադրբեջանի նախագահ Իլհամ Ալիևի հունվարի 21-ին Գերմանիա կատարած այցի շուրջ գերմանական մամուլի արձագանքները խոսում են այն մասին, որ գլխավորապես մարդու իրավունքների և ժողովրդավարության մասին հարցերի քննարկման պատճառով Գերմանիայի կանցլեր Անգելա Մերկելի հետ Ալիևի հանդիպումն անցել է խիստ լարված:

Ինչպես հաղորդում է «Արմենպրես»-ը, այս մասին հայտնում է գերմանական «Deutshce Welle» թերթն իր' «Ադրբեջանի նախագահի Բեռլին այցը. միջադեպ կանցլերի նստավայրի դիմաց» հրապարակման մեջ:

Թերթն առաջին հերթին անդրադարձել է Ադրբեջանում մարդու իրավունքների ցավալի վիճակին և այդ երկրում քաղբանտարկյալների խնդրին:

Գերմանական թերթը գրում է, որ Ալիևին Բեռլինում «այնքան էլ լավ չեն դիմավորել»: Հունվարի 21-ին Մերկելի նստավայր ժամանելու ժամանակ Ալիևին դիմավորել են բողոքի ակցիայով, որը կազմակերպել էին Amnesty International, Human Rights Watch, «Լրագրողներ առանց սահմանների» միջազգային իրավապաշտպան կազմակերպությունները: Ակցիայի ժամանակ նրանք հիշեցրել են Ադրբեջանում մեծ թվով քաղբանտարկյալներ և նվազագույնը 22 խղճի բանտարկյալներ լինելու մասին: Նրանք կոչ են արել անհապաղ բանտերից ազատ արձակել բոլոր քաղբանտարկյալներին, ընդդիմադիրներին ու իրավապաշտպաններին:

Ադրբեջանում մարդու իրավունքների խախտման թեման Ալիևին հանգիստ չի թողել նաև կանցլերի նստավայրում: Հանդիպման արդյունքներին նվիրված մամուլի ասուլիսում Մերկելն ընդգծել է, որ Ադրբեջանում մարդու իրավունքների իրավիճակը երկկողմանի հարաբերություններում Գերմանիայի համար կարևոր հարցերից մեկն է: Քննարկման թեմաներից մեկն էլ հանդիսացել է Գերմանիայի կողմից աջակցվող «Հարավային գազային միջանցք» կոչված նախագիծը:

Իր խոսքում Ալիևը փորձել է շրջանցել մարդու իրավունքների հարցը, սակայն, գերմանացի լրագրողի այն հիշեցմանը, որ մամուլի ազատության գծով Ադրբեջանը աշխարհի երկրների շարքում զբաղեցնում 160-րդ տեղը, Ալիևն ասել է, թե ոչ «Ադրբեջանի մամուլի ազատության» վարկանիշի, ոչ էլ իր «անձնական վարկանիշի» հետ կապված խնդիր չկա»: Նա ասել է, որ Ադրբեջանի բնակչության 90 տոկոսից ավելին աջակցում է իրեն, խոսել իր ղեկավարման տարիներին երկրի տնտեսական և այլ «հաջողությունների» մասին: Նա նաև նշել է, որ, իբր, իր երկրում մարդու իրավունքների և մամուլի ազատության սահմանափակումներ «չկան»:

Մերկելն Ալիևին հիշեցրել է, որ Ադրբեջանը Եվրոպայի Խորհրդի անդամ է, պարտավոր է պաշտպանել մարդու իրավունքները, ժողովրդավարական նորմերը և ապահովել օրենքի գերակայությունը:

«Մենք գտնում ենք, որ մարդու իրավունքների բնագավառում Ադրբեջանում խնդիրներ կան: Մենք խոսել ենք նաև մեր կողմից քննադատության պատճառ դարձած այդ դեպքերի մասին»,- ասել է Մերկելը:

Կանցլերը խոսել է Ալիևի հետ ունեցած տարակարծությունների մասին: Նա նշել է, որ Գերմանիան շահագրգռված է իր հիմնադրամների և կազմակերպությունների' Ադրբեջանում վստահելի իրավական հիմքով գործողունեություն ծավալելու մեջ: «Այս հարցի հետ կապված' մեր միջև տարակարծություններ կան»,- ընդգծել է Մերկելը:

Մերկել-Ալիև մամուլի ասուլիսի ժամանակ ուշագրավ մի միջադեպ էլ է տեղի ունեցել: Մամուլի ասուլիսի մասնակից իրավապաշտպանի գործողությունն ավելի է վատացրել Ալիևի առանց այն էլ վատ հոգեբանական վիճակը: Ասուլիսից հետո Մերկելի հետ Ալիևի լուսանկարվելու ժամանակ իրավապաշտպանը տեղից բարձր ձայնով Ադրբեջանի նախագահին կոչ է արել ազատ արձակել քաղբանտարկյալներին, ինչն Ալիևի մոտ շփոթմունք է առաջացրել: