Եվրամիությունը 25 մլն եվրոյով կաջակցի Հայաստանում գյուղատնտեսության ոլորտի զարգացմանը

Տնտեսություն 24 Հունվար, 2015 0:23

Եվրոպական միությունը Հայաստանին 25 մլն եվրո է տրամադրում գյուղատնտեության զարգացման և գյուղացու կենսամակարդակի բարձրացման նպատակով:

Ֆինանսական աջակցության ծրագրի մեկնարկի ժամանակ Հայաստանում ԵՄ պատվիրակության ղեկավար, դեսպան Տրայան Հրիսթեան հայտարարեց, որ աջակցությունը համահունչ է ԵՄ-Հայաստան համագործակցության առաջնահերթություններին: «Այս ծրագիրը համահունչ է Եվրամիության կողմից տրամադրվող օժանդակության առաջնահերթություններին և կնպաստի տնտեսական ու սոցիալական անհավասարությունների կրճատմանը: Գործազրկության բարձր ցուցանիշի և ցածր եկամուտների պատճառով աղքատությունը Հայաստանում շարունակում է բարձր մնալ: Դա տեսանելի է հատկապես գյուղական վայրերում: Իսկ գյուղատնտեսության զարգացումը կարող է նպաստել այդ հարցի որոոշակի լուծմանը: Հայաստանում կարևոր է նաև պարենային անվտանգության հարցը, քանի որ ՀՀ-ն գտնվում է բարդ տարածաշրջանում»,- «Արմենպրես»-ի հաղորդմամբ' ասաց Հրիսթեան:

ՀՀ գյուղատնտեսության նախարար Սերգո Կարապետյանն ընդգծեց, որ ծրագրի շրջանակում փորձելու են բացահայտել գյուղացու և գյուղատնտեսության հիմնական խնդիրները և լուծում տալ դրանց: «Գյուղատնտեսությունն ապահովում է Հայաստանի ՀՆԱ-ի շուրջ 20 տոկոսը, իսկ վերամշակող արդյունաբերության հետ' 25 տոկոսը: Դա զգալի թիվ է, հետևաբար ոլորտի զարգացումը կարևոր է: Ծրագրի շրջանակներում կփորձեն լուծել այնպիսի հարցեր, ինչպիսիք են պարենային անվտանգության բարձրացումը, գյուղատնտեսական կոոպերացիաների ստեղծումը, սննդի անվտանգության և այլ հարցեր»,- ասաց նախարարը:

Ծրագրի մեկնարկին ներկա էր նաև Ավստրիայի զարգացման գործակալության ներկայացուցիչ Գյունտեր Ցիմմերը, ով հայտարարեց, որ Ավստրիայի կառավարությունն իր հերթին 1 մլն եվրո լրացուցիչ գումար կտրամադրի Շիրակի, Լոռու և Տավուշի մարզերում գյուղատնտեսության ոլորտի զարգացման նպատակով:

Եվրոպական հարևանության գյուղատնտեսության և գյուղական համայնքների զարգացման ծրագրի իրականացման տևողությունը 3 տարի է: Այդ ընթացքում 20 մլն եվրո բյուջետային աջակցություն կտրամադրվի Հայաստանի կառավարությանը՝ գյուղատնտեսական և գյուղական համայնքների կայուն զարգացման համար: Միևնույն ժամանակ 5 մլն եվրո օժանդակություն կցուցաբերվի ՀՀ գյուղատնտեսության նախարարությանը' Հայաստանում ֆերմերների խմբերի և գյուղմթերքների որակային բարելավման համար: