Բելառուսը կարող է դուրս գալ ԵՏՄ-ից՝ համաձայնությունների չկատարման դեպքում. Լուկաշենկո

Բելառուսն իրեն իրավունք է վերապահում դուրս գալ Եվրասիական տնտեսական միությունից, եթե չկատարվեն ԵՏՄ-ի շրջանակներում ձեռք բերված պայմանավորվածությունները: Ինչպես տեղեկացնում է «Արմենպրես»-ը, Բելառուսի հանրապետության նախագահ Ալեքսանդր Լուկաշենկոն հունվարի 29-ին այս նախազգուշացմամբ հանդես է եկել բելառուսական և արտասահմանյան ԶԼՄ-ների համար անցկացված մամուլի ասուլիսում:

«Մենք մեզ իրավունք ենք վերապահում՝ ընդհուպ մինչև այդ միությունից դուրս գալը»,- հայտարարել է նա: Լուկաշենկոյի խոսքով՝ Եվրասիական տնտեսական միության ճանապարհը դյուրին չի լինելու:

ՏԱՍՍ-ի հաղորդմամբ՝ պետության ղեկավարը հավաստիացրել է, որ Բելառուսն ըստ ամենայնի աջակցելու է ինտեգրացման խորացմանը եվրասիական տնտեսական միության շրջանակներում, իրավահավասար միության ստեղծմանը՝ առանց բացառումների ու սահմանափակումների: «Մենք պարտավոր ենք օգտագործել այն հնարավորությունները, որոնք բացվում են Եվրասիական տնտեսական միության շրջանակներում»,- ասել է նա՝ ընդգծելով, որ Բելառուսը 2015 թվականի հունվարի 1-ից նախագահում է ԵՏՄ-ում:

2015 թվականի հունվարի 1-ից սկսել է գործել Եվրասիական տնտեսական միությունը: Դրա կազմավորման վերաբերյալ պայմանագիրը Ռուսաստանի, Ղազախստանի և Բելառուսի կողմից ստորագրվել է 2014 թվականի մայիսի 29-ին: Ավելի ուշ պայմանագրին միացել  է Հայաստանը, ԵՏՄ-ին մասնակցելու մտադրության մասին հայտարարել է նաև Ղրղզստանը:

Լուկաշենկոյի խոսքով՝ Բելառուսը ներկայումս ավելի շատ առևտուր է անում Արևմուտքի, քան Ռուսաստանի հետ: «Մենք արդեն ավելի շատ առևտուր ենք անում Արևմուտքի, քան Ռուսաստանի հետ»,- ասել է նա՝ նշելով, որ Ռուսաստանին բաժին է ընկնում Բելառուսի առևտրի ծավալի 42 տոկոսը՝ նախկին 85 տոկոսի համեմատությամբ: Լուկաշենկոն Մինսկի գլխավոր խնդիրը համարել է արտահանման դիվերսիֆիկացումը: