ԱՄՆ-ը կարող է զենքի մատակարարում սկսել Ուկրաինային. The New York Times

ԱՄՆ-ը կարող է զենքի մատակարարում սկսել Ուկրաինային: Այդ մասին, ինչպես տեղեկացնում է «Արմենպրես»-ը, իր էլեկտրոնային տարբերակում հաղորդել է The New York Times թերթը:

Հրատարակության տվյալներով՝ Ուկրաինային ռազմական օգնություն ցուցաբերելուն է հակվում Եվրոպայում ԱՄՆ-ի և ՆԱՏՕ-ի զինված ուժերի գլխավոր հրամանատար գեներալ Ֆիլիպ Բրիդլավը, ինչպես նաև Բարաք Օբամայի վարչակազմի և Պենտագոնի բազմաթիվ ներկայացուցիչներ:

«ԱՄՆ-ի նախագահը դեռևս որոշում չի ընդունել նման օգնություն տրամադրելու մասին: Սակայն մի շարք լուրջ անհաջողություններից հետո, որոնք ուկրաինական ուժերը կրել են վերջին շաբաթներին, Օբամայի վարչակազմը վերստին ուսումնասիրում է ռազմական օգնություն ցուցաբերելու հարցը»,- նշում է թերթը:

Ինչպես հաղորդել է ՏԱՍՍ-ը, ԱՄՆ-ի պետքարտուղար Ջոն Քերին, որը փետրվարի 5-ին այցով ժամանելու է Կիև, ԱՄՆ-ի զինված ուժերի շտաբների պետերի կոմիտեի նախագահ գեներալ Մարտին Դեմփսին և նախագահ Օբամայի՝ ազգային անվտանգության հարցերով օգնական Սյուզան Ռայսը «պատրաստ են քննարկելու Ուկրաինային ռազմական օգնություն տրամադրելու հարցը»: