Անցյալ տարվա դեկտեմբերին դեղերը թանկացել էին 10-15 տոկոսով

Տնտեսություն 3 Փետրվար, 2015 2:24

Դեղերի պարտադիր դրոշմապիտակավորման և արտարժույթի թանկացման հետևանքով 2014 թվականի դեկտեմբերին դեղերի գների առավելագույն աճը կազմել է 10-15 տոկոս, որը ներկայումս 3-5 տոկոս է. ընդ որում, դեղերի թանկացման բարձրակետը համընկել է արտարժույթի ամենաբարձր գների օրերի հետ։ Այս գնահատականները փետրվարի 2-ի ասուլիսին ներկայացրեց Հայաստանի Դեղ արտադրողների և ներմուծողների միության (ԴԱՆ միություն) գործադիր տնօրեն Սամվել Զաքարյանը՝ հավելելով, որ ՀՀ շուկայում շրջանառվող դեղագործական արտադրատեսակների 90 տոկոսը ներմուծվում է։

Ըստ նրա՝ ԴԱՆ միությունում հաշվարկել են, որ դեղերի պարտադիր դրոշմավորման հետևանքով թանկացումը կազմել է գների ընդհանուր աճի 4.5-5 տոկոսը, մինչդեռ, ՀՀ առողջապահության հաշվարկներով՝ դրա հետևանքով թանկացումը 3-5 դրամ է։

«Մենք պնդում ենք, որ դեղերի պարտադիր դրոշմավորման կարգը ներդնելու կարիքը չկար։ Այն ներդրվեց դեղերի ստվերային շրջանառության դեմ պայքարելու նպատակով։ Գործընթացի ներդրումից հետո անցել է երեք ամիս, և ԴԱՆ միությունը մտադիր է դիմել ՀՀ ֆինանսների նախարարությանը ՝ կարգի ներդրման շնորհիվ ստվերային շրջանառության կրճատման և շրջանառության աճի ցուցանիշների մասին տեղեկանք տրամադրելու առաջարկով»,- հայտնեց Սամվել Զաքարյանը՝ հավելելով, որ մտադրությունը վերաբերում է նաև վեցամսյա կտրվածքով տեղեկանք ստանալուն։

Նա հավաստեց, որ Հայաստանի դեղ արտադրողները և ներմուծողներն օրինապաշտ են, գործում են թաթանցիկ՝ գործող օրենսդրության սահմաններում։