Հայաստանի 2014թ. 3.9% տնտեսական աճը կարելի է գնահատել որպես միջին ցուցանիշ. տնտեսագետ

Հայաստանին անցած տարում հաջողվեց ապահովել 3.9% տնտեսական աճ, ինչը կարելի է գնահատել որպես միջին աճ՝ հաշվի առնելով համաշխարհային ասպարեզում տեղի ունեցող իրադարձությունները և դրանց ազդեցությունը Հայաստանի վրա. այդ իրադարձություններն են Ռուսաստանի դեմ կիրառվող պատժամիջոցները, եվրոյի գոտում բարդ տնտեսական իրավիճակը: Այս մասին, «Արմենպրես»-ի հաղոդրմամբ, փետրվարի 4-ին լրագրողների հետ հանդիպմանը նշեց տնտեսագետ Վիլեն Խաչատրյանը:

Նրա տվյալներով՝ ընդհանուր առմամբ, 2014 թ. հիմնականում տնտեսական աճ ապահովող ոլորտներից էին գյուղատնտեսությունը, որը դրան նախորդող տարվա հետ համեմատ աճել է 7.2%-ով, իսկ անկում է գրանցվել, մասնավորապես, շինարարության ոլորտում՝ 4,3%:

«Մենք ունենք բավական մեծ արտահանման բլոկ, որը ավելի արագ է աճել, քան ներմուծումը, իսկ վերջինս մնացել է գրեթե նույն մակարդակի վրա: Կարելի է ասել, որ կառավարության կողմից որդեգրած արտահանման խթանման քաղաքականությունը անցած տարի տվեց իր արդյունքները, և արտահանումը ունեցել է ծավալների 2.7% աճ, իսկ ներմուծումը՝ 0.4%: ԱՊՀ երկրներ է արտահանվել 365 միլիոն դոլարի ապրանք, ինչը նշանակում է, որ օրական 1 միլիոն դոլարի ապրանք է արտահանվում: Իսկ ԵՄ արտահանման ծավալները ավելին են եղել, սակայն նախորդ տարվա հետ համեմատ նվազել են 1.9% տոկոսով», - ասաց Վիլեն Խաչատրյանը:

Խոսելով անցած տարվա գնաճի վերաբերյալ՝ տնտեսագետը նշեց, որ գնաճը 2014 թ. կազմել է 3%, որտեղ ամենաբարձրը եղել է գյուղատնտեսական ապրանքների գնաճը, որը կազմել է 5,3%: Վիլեն Խաչատրյանի համաձայն՝ կարելի է ասել, որ ինֆլյացիայի միտումը ոչ միայն պայմանավորված է սպառողական գների ինդեքսով, այլ նաև արդյունաբերական արտադրանքի, որը ունեցել է 8,4% գնաճ, ինչը վկայում է այն մասին, որ արդյունաբերության ոլորտն ստիպված է եղել ավելի թանկ գներով հումք ձեռք բերել: