Սակավաջրության հետևանքով փոքր ՀԷԿ-երի փակման վտանգ դեռ չկա

Հանրապետությունում ջրի սակավությամբ պայմանավորված` փոքր հիդրոէլեկտրակայաններում էլեկտրաէներգիայի արտադրության ծավալը նվազել է, սակայն դեռևս չկա վտանգ, որ ՀԷԿ-երը կարող են փակվել:

«Արմենպրես»-ի հարցին ի պատասխան` այս մասին տեղեկացրեց ՀՀ բնապահպանության նախարարության ջրօգտագործման թույլտվությունների բաժնի պետ Դավիթ Գրիգորյանը: Նա ընդգծեց, որ ՀԷԿ-երն աշխատում տարբեր ռեժիմներով, և ջրառի քանակը կարգավորվում է: «Այսօրվա դրությամբ տեղեկատվություն չկա, որ որևէ ՀԷԿ փակվել է կամ կարող է փակվել սակավաջրության հետևանքով: Բացի այդ, ջրօգտագործման թույլտվության մեջ նշվում է այն բնապահպանական թողքը, որն անհրաժեշտ է գետի էկոլոգիական հավասարակշռությունը ապահովելու համար, և եթե ջուրն սկսում է նվազել, պետք է կարգավորել ջրառի քանակը»,- «Արմենպրես»-ի հաղորդմամբ` ասաց Գրիգորյանը:

Բնապահպանության նախարարության ներկայացուցիչն ընդգծեց, որ տվյալների բազայի ստեղծումից հետո հնարավորություն կլինի առցանց հսկելու ջրառի ծավալը: «Հսկողություն է սահմանվում նաև ձկնապաշտպան կառույցների ստեղծման գործընթացքում: Ներկայումս որպես պայման նշվում է, որ ՀԷԿ-ը պարտավոր է ձկնուղիների անցման համար կառույցներ ստեղծել, և եթե դա չի արվում, ապա արձանագրվում է ջրօգտագործման իրավունքի խախտում և կասեցվում է թույլտվությունը»,- ասաց նա:

Փոքր ՀԷԿ-երի կողմից արտադրված էլկտրաէներգիայի ծավալը 2014 թվականին նվազել է 8.7 տոկոսով և կազմել 1 մլրդ 992.6 մլն կՎտ/ժ: Դա կազել է ընդհանուր արտադրության ավելի քան 8 տոկոսը: