Շահութահարկի վերաբերյալ առաջարկվող փոփոխությունները Հայաստանում արտահանման մոնոպոլիա չեն ստեղծի. Միրումյան

Առնվազն 50 միլիարդ դրամի չափով արտահանում իրականացնող կազմակերպությունների համար շահութահարկի դրույքաչափի էական նվազեցումը Հայաստանում արտահանման մոնոպոլիա չի ստեղծի:

Այս մասին Ազգային ժողովում լրագրողների հետ զրույցում հայտարարեց ՀՀ ֆինանսների նախարարի տեղակալ Վախթանգ Միրումյանը՝ անդրադառնալով «Շահութահարկի մասին օրենքում» փոփոխություններ և լրացումներ կատարելու մասին օրենքի նախագծին, որով առաջարկվում է շահութահարկի դրույքաչափը 20 տոկոսից դարձնել 2 տոկոս բոլոր այն կազմակերպությունների համար, որոնք կկարողանան իրականացնել առնվազն 50 միլիարդ դրամի չափով արտահանում, իսկ նրանց արտահանման ծրագիրը կարժանանա կառավարության հավանությանը: «Մեր նպատակը ոչ թե արտահանման մոնոպոլիա ստեղծելն է, այլ հարկային արտոնություններ տրամադրելը, որպեսզի արտերկրի կազմակերպությունները, շահագիգիռ կողմերը Հայաստանում իրականացնեն ներդրումներ և Հայաստանի Հանրապետության տարածքից ունենան արտահանում: Այսինքն՝ մենք չենք խոսում այն մասին, որ կարող է ստեղծվել մեկ արհեստական ընկերություն, որը կենտրոնացված կարգով արտահանում կիրականացնի՝ այդպիսով ընկնելով հարկային արտոնության տակ: Այսինքն՝ մենք նպատակ ունենք պահպանել արտահանման ներկայիս տեմպերը՝ միաժամանակ պայմաններ ստեղծելով, որպեսզի յուրաքանչյուր հավանության արժանացած ծրագրով ունենանք արտահանման աճ»,- «Արմենպրես»-ի հաղորդմամբ՝ նշեց Միրումյանը:

Նա ընդգծեց, որ կառավարությունը, օրենքի նախագիծը մշակելիս, մտահոգություն է ունեցել, որ մի քանի կազմակերպություններ կարող են միավորվել և կենտրոնացված կարգով կատարել արտահանումը, գերազանցել 50 միլիարդ դրամի շեմը և հարկային արտոնություն ստանալ: «Դրա համար մենք մշակել ենք համապատասխան կանխարգելիչ մեխանիզմներ, որպեսզի նման դեպքերից խուսափենք: Օրենքի նախագծում նշված է, որ արտահանման ծրագիրը պետք է անպայման արժանանա կառավարության հավանությանը: Հայաստանի շուկան շատ փոքր է, և կառավարությունը կարող է ճիշտ գնահատել իրավիճակը, առկա ռիսկերը և նման երևույթներ թույլ չտալ»,- ընդգծեց Միրումյանը:

Նա նշեց, որ խոսքն իրապես գործարար ծրագրի մասին է, որը նշանակում է նոր ներդրումներ, նոր աշխատատեղեր, նոր արդյունքի ստեղծում և արտահանման ծավալի աճ: