Հունվարին սպառողական շուկայում արձանագրվել է 2.5 տոկոս գնաճ

ՀՀ սպառողական շուկայում 2015թ. հունվարին 2014թ. դեկտեմբերի համեմատ արձանագրվել է 2.5 տոկոս գնաճ, ինչը մեծապես պայմանավորվել է պարենային ապրանքների 4.5 տոկոս գնաճով: Ոչ պարենային ապրանքների շուկայում և ծառայությունների ոլորտում նշված ժամանակահատվածում գներն ու սակագներն աճել են 0.5 տոկոսով:

Ինչպես «Արմենպրես»-ին տեղեկացրին ՀՀ ազգային վիճակագրական ծառայությունից, 2015թ. հունվարին 2014թ. հունվարի համեմատ սպառողական գների ինդեքսը կազմել է 104.3 տոկոս, այդ թվում, պարենային ապրանքներինը (ներառյալ ոգելից խմիչք և ծխախոտ)` 105.3 տոկոս, ոչ պարենային ապրանքներինը` 102.4 տոկոս, ծառայություններինը` 103.2 տոկոս:

2015թ. հունվարին 2010թ. համեմատ սպառողական գների ինդեքսը կազմել է 127.4 տոկոս, այդ թվում, պարենային ապրանքներինը՝ 133.9 տոկոս, ոչ պարենային ապրանքներինը՝ 117.4 տոկոս, ծառայությունների սակագներինը՝ 121 տոկոս: Հանրապետության դիտարկվող բոլոր քաղաքներում 2015թ. հունվարին 2014թ. դեկտեմբերի համեմատ գրանցվել է սպառողական գների 2.2-3.6 տոկոս գնաճ: Մայրաքաղաքում սպառողական գներն աճել են 2.2 տոկոսով: