ՓՄՁ ներկայացուցիչներն առաջարկություններ են պատրաստում կառավարության հետ քննարկումների համար

Փոքր և միջին ձեռներեցները վճռական են տրամադրված «Շրջանառության հարկի մասին» մասին օրենքում փոփոխություններ կատարելու հարցում: Լրատվամիջոցների հետ հանդիպմանը Փոքր ձեռներեցությամբ զբաղվողների հայկական միության նախագահ Ստեփան Ասլանյանը հայտարարեց, որ նախաձեռնել են հանդիպումների շարք տոնավաճառներում, կրպակներում և ՓՄՁ այլ օբյեկտներում աշխատող ձեռներեցների հետ, որպեսզի լսեն նրանց առաջարկները և դրանք ներկայացնեն կառավարությանը:

«Չենք կարող թույլ տալ, որ օրենքն ընդունվի ներկայիս տեսքով: Դա կարող է վերջ դնել Հայաստանում փոքր ձեռնարկատիրության գոյությանը: Ինչպես նախկինում առաջարկել էինք, կառավարության հետ բանակցելու ենք ներկայացված 4 պահանջների շուրջ, իսկ ոսկու շուկայի մասով առանձին քննարկում է ընթանալու: Իսկ մինչ այդ, մենք փորձում ենք լսել փոքր և միջին ձեռներեցների առաջարկները' դրանք ևս Կառավարության հետ քննարկումների ժամանակ ներկայացնելու համար»,- «Արմենպրես»-ի հաղորդմամբ' ասաց Աս լանյանը:

Փոքր ձեռներեցությամբ զբաղվողների ներկայացուցիչը նշեց, որ մինչ օրս քաղաքական ուժերից որևէ առաջարկ չեն ստացել: «Եվս մեկ անգամ կրկնում եմ, որ մեր սկսած պայքարը ուղղորդված չէ որևէ մեկի կողմից: Մենք պայքարում ենք մեր աշխատանքի և օրվա հացի համար, քանի որ չենք ուզում հեռանալ մեր հայրենիքից: Իսկ այն, որ որոշ քաղաքական ուժեր փորձում են ԶԼՄ-ների միջոցով իրենց վերագրել որոշ փաստեր, չի համապատասխանում իրականությանը»,- ասաց նա:

«Հայաստանի տոնավաճառներ» ՀԿ նախագահ Գագիկ Դանիելյանը տեղեկացրեց, որ օրեցօր նկատվում է տոնովաճառներում ձեռներեցների թվի կրճատում: «Կարծում եմ՝ պետք է այս պայքարն արագ ավարտին հասցնենք, քանի որ ձեռներեցների թիվը կրճատվում է»,- ընդգծեց նա:

«Ոսկերչությամբ զբաղվող ՓՄՁ հայկական միավորում» ՀԿ նախագահ Արմեն Բաբայանն էլ հայտնեց, որ ոսկերչության մասով իրենց առաջարկությունները քննարկելու են կառավարության հետ և փորձելու են հասնել նրան, որ իրենց մասով առանձին մոտեցում ցուցաբերվի:

«Շրջանառության հարկի մասին» օրենքի վիճահարույց դրույթը՝ պարտադիր փաստաթղթավորման պահանջը, ուժի մեջ էր մտել 2015թ. փետրվարի 1-ից: Օրենքը, սակայն, կրկին առաջացրել էր տնտեսավարող սուբյեկտների դժգոհությունը: Ընդառաջ գնալով տնտեսավարող սուբյեկտներին՝ ՀՀ կառավարությունն ԱԺ քննարկմանն է ներկայացրել ապրանքների պարտադիր փաստաթղթավորումը մինչև 2015թ. հուլիսի 1-ը հետաձգելու մասին օրենքի նախագիծը, որն էլ ընդունվել է Ազգային ժողովի կողմից: