Էներգետիկայի միջազգային գործակալությունը նավթի համաշխարհային պահանջարկի աճ է կանխատեսում

Առաջիկա հինգ տարում աշխարհում նավթի պահանջարկը կսկսի վերականգնվել 2014 թվականի խիստ դանդաղ աճից հետո, սակայն այն ավելի թույլ կլինի 2008 թվականի ֆինանսական ճգնաժամից առաջ պահանջարկի աճից: Այդ մասին, ինչպես տեղեկացնում է «Արմենպրես»-ը, ասված է Էներգետիկայի միջազգային գործակալության զեկույցում ( ԷՄԳ):

«Համաշխարհային պահանջարկի աճը միջին հաշվով տարեկան կկազմի 1,2 տոկոս, ինչն ավելի թույլ է միջճգնաժամային ժամանակաշրջանի պահանջարկից (1,9 տոկոս 2001-ից մինչև 2007 թվականներն ընկած ժամանակաշրջանում)»,-նշվում է ԷՄԳ-ի զեկույցում, որը նվիրված է նավթաշուկայի զարգացման հնգամյա կանխատեսմանը:

Գործակալության կանխատեսումների համաձայն՝ 2020 թվականին համաշխարհային պահանջարկը կկազմի օրական 99,1 մլն բարել նավթ: 2014-ից մինչև 2020 թվականն ընկած ժամանակաշրջանում նավթի պահանջարկն կավելանա օրական 6,6 միլիոն բարելով: Դրա հետ մեկտեղ պահանջարկի ավելացումը գրեթե 1,5 միլիոն բարելով կգերազանցի նավթի համաշխարհային արդյունահանման աճը, որը կկազմի 5,2 մլն բարել:

ՌԻԱ Նովոստիի հաղորդմամբ՝ ԷՄԳ-ն սպասում է, որ 2015 թվականին պահանջարկը կկազմի օրական 93,3 մլն բարել նավթ: Գործակալությունը կանխատեսում է, որ 2016 թվականին համանման ցուցանիշը կկազմի օրական 94,5 մլն բարել նավթ: